Туркия ҳукумати мамлакатда қўлланилаётган вакциналар билан сайёҳларни ҳам эмлашга расман рухсат берди. Европадан ташқаридаги давлатлар, хусусан Ўзбекистон фуқароларига бу Европа Иттифоқида тан олинган вакцинация сертификатини қўлга киритиш учун қулай вариант бўлиши мумкин.
12 январь куни Tinkoff journal чоп этган хабарга кўра, Туркия Соғлиқни сақлаш вазирлиги декабрь ойи охирида тиббиёт ташкилотларига мактуб йўллаб, хорижлик сайёҳларни икки компонентли Pfizer/BioNTech ва Sinovac вакциналари билан эмлаш мумкинлигини билдирган.
Сайёҳлар учун эмланиш пулли — битта инъекция учун 400 турк лираси (тахминан, 28 доллар) тўланади, дейилган мактубда. 14 январь куни «Вестник АТОР» нашри Туркиядаги бир қатор тиббиёт ташкилотлари билан боғлангани, хорижликларни эмлаш ҳақидаги Соғлиқни сақлаш вазирлиги хатининг ҳақиқийлиги ҳамма жойда тасдиқлангани ҳақида хабар берди.
Туркия COVID сертификатларининг Европа тизимига уланган: ушбу мамлакатда бериладиган вакцинация сертификати Европа Иттифоқида бериладиган сертификатга тенгдир ва бундай сертификат эгалари (фуқаролигидан қатъий назар) визаси билан Европа Иттифоқи мамлакатлари бўйлаб эркин ҳаракатланиши ва у ерда исталган жамоат жойларига ташриф буюриши мумкин.
Туркиянинг аксарият клиникаларида сайёҳларни қабул қилиш ҳали бошланмаган бўлса-да, техник муаммолар ҳал этилгач, яқин келажакда бунинг ижроси кутилмоқда. Сайёҳлар «қизил паспорт» билан олдиндан рўйхатга ёзилмасдан туриб ҳам эмланиши мумкин.
Шу билан бирга, бир нечта турк клиникалари «Вестник АТОР»га Россиянинг «Спутник V» вакцинаси билан тўлиқ эмланган сайёҳларга Pfizer/BioNTech’нинг битта бустер дозасидан кейин сертификат берилиши мумкинлигини тасдиқлаган.
Изоҳ (0)