Oliy Majlis Qonunchilik palatasining Agrar va suv xo‘jaligi masalalari qo‘mitasi “Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi prezident farmoni loyihasi muhokamasiga bag‘ishlangan seminar o‘tkazdi. Bu haqda parlament quyi palatasi matbuot xizmati xabar berdi.
Ta’kidlash kerakki, Taraqqiyot strategiyasi loyihasining 30, 31 va 32-maqsadlarida qishloq xo‘jaligi sohasini jadal rivojlantirish bo‘yicha muhim vazifalar o‘rin olgan. Xususan, qishloq xo‘jaligini ilmiy asosda intensiv rivojlantirish orqali dehqon va fermerlar daromadini kamida 2 baravar oshirish, qishloq xo‘jaligining yillik o‘sishini kamida 5 foizga yetkazish ko‘zda kutilgan.
Shuningdek, suv resurslaridan samarali foydalanish hisobiga har yili kamida 7 milliard kub metr suvni iqtisod qilish, suv xo‘jaligi obyektlarida elektr energiyasi iste’molini 7,3 milliard kilovatt/soatdan 6,9 kilovatt/soatgacha kamaytirish, suv xo‘jaligi obyektlarini davlat-xususiy sheriklik tamoyillari asosida boshqarish maqsad qilingan.
Taraqqiyot strategiyasini 2022-yilda amalga oshirish bo‘yicha “Yo‘l xarita”da yuqoridagi 3 ta maqsadlarning bajarilishini ta’minlash yuzasidan 18 ta tadbir belgilangan va bular 41 ta amalga oshirish mexanizmlari orqali ijro etilishi nazarda tutilgan.
Seminarda mazkur hujjatda belgilangan vazifalarni amalga oshirish orqali paxtadan o‘rtacha 40-45 sentner, g‘allani 70-75 sentner, 200 ming gektar paxta va g‘alla maydonlarida lazerli tekislashni joriy qilish, 110 ta meva-sabzavotchilik va 35 ta g‘allachilik klasterlari faoliyatini yo‘lga qo‘yish nazarda tutilayotgani qayd etilgan.
Shu bilan birga, 75 ming gektar intensiv bog‘ va yangi uzumzorlar barpo etish, 129 ming gektar yerlarni foydalanishga kiritish, suv tejovchi texnologiyalarni 260 ming gektarda joriy etish, chorva ozuqa maydonini 722 ming gektarga yetkazish maqsad qilingani ta’kidlangan.
Yakunda deputatlar tomonidan farmon loyihasi bo‘yicha bir qator takliflar bildirilib, qo‘mitaning tegishli qarori qabul qilingan.
Eslatib o‘tamiz, Shavkat Mirziyoyev 2019-yil 5-noyabrda o‘tkazilgan yig‘ilishda xorijiy mutaxassislar ko‘magida tashkil etilgan Surxondaryo tajribasi asosida 55 ta tumanni eksportbop meva-sabzavot mahsulotlari turini yetishtirishga ixtisoslashtirish vazifasini qo‘ygandi. Shuningdek, prezident tomonidan 2019-yil 9-dekabr kuni o‘tkazilgan yig‘ilishda mamlakatda meva-sabzavotchilikda klaster tizimini yo‘lga qo‘yish bo‘yicha topshiriq berilgan. 2020-yilda esa O‘zbekistonda 2021-yil oxirigacha 3 ming gektar intensiv bog‘ yaratilib, 2,5 mingta oilaga bo‘lib berilishi ma’lum bo‘lgandi.
Izoh (0)