Тошкентнинг Алишер Навоий номидаги Cinema Palace киносаройида Ўзбекистон бокс фахрийси Сидней Жексон хотирасига бағишланган фильм намойиши бўлиб ўтди.
Тадбирда Туризм ва спорт вазирининг биринчи ўринбосари Улуғбек Аъзамов, Сидней Жексоннинг қизи Паина Жексон-Кац, АҚШнинг Ўзбекистондаги фавқулодда ва мухтор элчиси Даниэль Розенблюм сўзга чиқиб, боксчининг босиб ўтган йўли, ўзбек спортига қўшган ҳиссаси, ўзбек бокс мактабига асос солгани ҳақида сўзлади. Шундан сўнг Сидней Жексон феномени ҳужжатли фильми намойиш этилди.
Сидней 1886 йил Нью-Йоркда таваллуд топган. Болалигиданоқ кўп меҳнат қилишига тўғри келган. Аммо бокс билан шуғуллана бошлагач, ҳаётини ушбу спорт турига бағишлашга қарор қилган.
1914 йилда америкалик боксчилар жамоаси таркибида Сидней бокс ватани Буюк Британияга жўнайди. У ерда инглиз боксчилари билан бир қатор жанглар ўтказиш режалаштирилган эди. Жанглардан бирида Жексон қўлидан оғир жароҳат олади ва маҳаллий касалхонада даволанади. Америкалик спортчилар ўз юртига қайтиб кетгач, Сиднейнинг дўсти, чикаголик тадбиркорнинг ўғли уни Россияга саёҳатга ва бизнес қилиш учун таклиф қилади. Шу тариқа боксчи Санкт-Петербургга бориб қолади. Биринчи Жаҳон урушининг бошланиши уларга Европа орқали ортга қайтишга имкон бермади. Америка консули унга Туркистонга боришни ва у ердан АҚШга кетишни маслаҳат беради. Сидней Ўзбекистонга ташриф буюради ва умрбод шу ерда қолиб кетади.
Отам босиб ўтган йўл жуда қийин кечган. Оила қургунига қадар бу ерда (Тошкентда) унинг ҳеч қандай қариндошлари бўлмаган. Онамнинг оиласи уни яхши кўрарди. Лекин унинг ўзида ўша пайт илиқ сўз айта оладиган қариндоши йўқ эди. Ахир бу даҳшат эмасми?Бокс бўйича биринчи Ўзбек Жаҳон чемпиони Руфат Рисқиев ҳам биринчи мураббийи Сидней Жексон ҳақида илиқ фикрлар билдирди.Бир куни дадамга савол бердим: сиз жуда меҳрибон одамсиз, нима учун спорт турлари ичида айнан боксни танлагансиз? Ахир, мени наздимда бокс фақат муштлашувдан иборат эди-да. Дадамнинг жавобини эса бир умрга эслаб қолдим. Назаримда, доно жавоб эди. «Бу жуда ақлли ўйин. Унда биринчи навбатда бош ишлаш керак. Сен уни муштлашув деб ўйлаб адашяпсан, қизим. Тасаввур қил, ўлчовли макон, унда икки киши учрашиб қолди. Улар худди икки саркардадек. Улар ўз муносабатларини шундай қуриши керакки, пировардида рақибини енгиши лозим. Шунинг учун биринчи навбатда, бош ишлаши керак. Оёқлари идеал даражада ишлаши, муштдан қоча олиш, чап бериш учун. Энг охири жуда кучли зарба бўлиши лозим. Шунинг учун бу ақлли ўйин. Бу худди икки адмиралнинг жангига ўхшаб кетади. Ҳеч қаерга қочиб кета олмайсан, наҳотки буни муштлашув деб атасанг?», — деган эди.
Паина Жексон-Кац, Сидней Жексоннинг қизи
Сидней Львович менинг биринчи мураббийим эди. Болалар билан акробатикага бордик. Улар кетди, мен эса қолдим. Кейин эса улар боксга, Жексоннинг олдига борди. Мен ҳам уларга қўшилиб олдим. Яна улар кетди, мен қолдим. Боксдаги илк таълимни Жексондан, ўрта таълимни Барановдан, олий мактабни эса Гранаткиндан олдим. Сидней Львович кексайиб қолган, бир гуруҳ болаларга билим берарди. Туриш, мушт уриш, нафасни тўғри олишни ўргатарди. Зарба бераётганда, бурунда нафас олинса, ўпкада ҳаво айланади. Жексон бунга алоҳида эътибор қаратарди. Очиғини айтиш керак, кўп боксчилар нотўғри нафас олади ва жуда тез чарчаб қолади.Руфат Рисқиев, боксчи
Сидней Жексон феномени номли ҳужжатли фильми «Шайхонтоҳур-фильм» киностудияси томонидан Туризм ва спорт вазирлиги билан ҳамкорликда тасвирга олинган. Фильмнинг сценарий муаллифи ва продюсери Борис Бабаев, режиссёр – Наврўза Бийназова.
Изоҳ (0)