Тошкентнинг «Пахтакор» жамоаси 2022 йилги мавсумда чиройли футбол кўрсатиб, чемпион жамоани ўз мақомида сақлаб қолишни мақсад қилган. Бу ҳақда клубнинг янги бош мураббийи Славче Войнески 13 январь куни ўтказилган матбуот анжуманида маълум қилди, дея хабар бермоқда «Дарё» мухбири.
«Пахтакор»дек жамоага келганимдан хурсандман. «Пахтакор» нафақат совринлар, балки ҳар тарафлама Ўзбекистондаги энг катта клуб. Мураббий учун бундай клубда ишлаш жуда катта масъулият. Суперлига, Ўзбекистон Кубоги ва Суперкубокда зафар қучишга интиламиз. Деярли 40 кундан сўнг Суперкубок билан мавсумни бошлаймиз.Чемпионлар Лигасида ҳам яхши иштирок этишга интиламиз. Совринлар ўз йўлига, биз Ўзбекистонда энг яхши ва ҳужумкор футболни намойиш қилишимиз керак. Яхши ўйнасак, бу билан миллий терма жамоага ҳам ёрдам берамиз.
Славче Войнески, «Пахтакор» бош мураббийи
Славче Войнескининг сўзларига кўра, у сўнгги олти ойда ўзбек футболи ҳақида кўп маълумотларни ўрганган. Мураббий журналистларга жамоа ҳужумкор футбол кўрсатишини айтиб, ваъда берди.
«Дарё» мухбирининг «Пахтакор»да бюджет қисқараётгани жамоани етакчилар тарк этиши билан бирга, натижага ҳам таъсир қилиш эҳтимоли ҳақидаги саволга мураббий шундай жавоб берди:
«Бутун дунёда коронавирус билан боғлиқ ҳолатлар сабаб клублар раҳбариятига осон эмас. Бундай ҳолатга мослашиш керак. ‘Пахтакоръдан баъзи етакчилар кетди, лекин таркибда яхши савиядаги ижрочилар жамланган. Яна баъзи кучайишлар бўлиши мумкин. Яхши ишлаган тақдиримизда мавсум охирида ижобий кайфиятда бўламиз».
Жамоа спорт директори Жаъфар Ирисметов ҳам ушбу саволга жавоб бераркан, жамоани Анзур Исмоилов тарк этиши катта йўқотиш бўлганлигини таъкидлаб ўтди.
«Унинг ўрнини тўлдиришга уринамиз. Мураббий билан бир неча вариантларни кўриб чиқамиз. Қолган асосий таркиб ўйинчиларини сақлаб қолдик. Авазбек Ўлмасалиев ва Миржаҳон Мираҳмадов каби ёш футболчилар билан шартнома имзоладик. Сардор Собирхўжаевни олиб қолишга ҳаракат қиляпмиз. Шунингдек, яқин орада яна бир футболчининг сафимизга қўшилиши ҳал бўлиши мумкин. Бу жамоамизни анча кучайтирган бўларди. Сардор Рашидов айни пайтда машғулотда қатнашмоқда. У мураббийда ижобий таассурот қолдирди», — дейди Ирисметов.
Славче Войнескининг таъкидлашича, у «Пахтакор» таклифини қабул қилгандан кейин Туркия клубидан ҳам таклиф тушган, бироқ мураббий уни рад этган.
«Олти ой илгари менежерим ‘Пахтакор’да мураббий ўзгариши мумкинлигини айтди. Декабрда эса жаноб Питер қолишини айтишди. Кейин эса орадан бир ой ўтиб ‘Пахтакор’дан қўнғироқ бўлди ва ишга таклиф этишди. Тўрт дақиқадан сўнг эса Туркия клубидан қўнғироқ ва таклиф бўлди. Лекин мен ‘Пахтакоръга розилик билдириб бўлганим сабабли кейинги таклифни рад этдим. Ваъда бердимми, буни бажараман», — дейди шимолий македониялик мутахассис.
Жаъфар Ирисметов, шунингдек, Славче Войнескининг олдига «Пахтакор» билан ички мусобақаларда ғолибликка эришиш вазифаси қўйилганлигини айтиб ўтди. Унинг сўзларига кўра, Питер Ҳюистра чемпионат якунидан кейин клубга 3 январь куни қайтиши керак бўлган. Бироқ нидерландиялик мутахассис жамоа билан алоқага чиқмаган.
Эслатиб ўтамиз, 11 январь куни «Пахтакор» Славче Войнески билан шартнома имзоланганини эълон қилди. Аввалроқ «Пахтакор» «Дарё»га жамоанинг нидерландиялик бош мураббийи Питер Ҳюистра билан ҳамкорлик давом эттирилмаслигини маълум қилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)