Ўзбекистонга «омикрон» штамми аниқланган фуқаро билан самолётда бирга келган 200 киши карантинга олинган. Бу ҳақда 10 январь куни АОКАда ўтказилаётган матбуот анжуманида Санитария-эпидемиологик осойишталик ва жамоат саломатлиги хизмати бошлиғининг биринчи ўринбосари айтиб ўтди, дея хабар бермоқда «Дарё» мухбири.
«Бемор билан бирга самолётда келган барча йўловчилар карантинга олинган. Ўзбекистон фуқаролари уй шароитида, чет эл фуқаролари эса меҳмонхона шароитида карантинга олинган», — деди Холмамат Норбоев.
Соғлиқни сақлаш вазирлиги матбуот хизматининг аниқлик киритишича, Ўзбекистонга бемор билан самолётда 200 киши келган. Уларнинг 130 нафари Ўзбекистон фуқаролари, 70 нафар эса хорижий фуқаролардир.
Эслатиб ўтамиз, мамлакатга келган хорижий давлат фуқаросидан COVID-19 нинг янги «омикрон» штамми жорий йилнинг 7 январь куни аниқланган. Шу сабабли барча ташкилот, корхона ва муассасаларда, йирик савдо мажмуалари, супермаркетлар, кўнгилочар муассасаларнинг кириш қисмида ниқобда бўлиш, ижтимоий масофани сақлаш, тана ҳароратини ўлчаш амалиётига қатъий риоя этилиши таъминланади.
Санитария-эпидемиологик осойишталик ва жамоат саломатлиги хизмати бошлиғи ўринбосари, тиббиёт фанлари доктори, профессор Нурмат Отабеков «омикрон» бошқа штаммларга қараганда анчагина юқумли ва қисқа муддатда аҳолининг катта қисмини зарарлаши мумкинлигини айтганди.
Шунингдек, эмланмаган ходимлар ишга қўйилмайди. Вазирлик ва идора раҳбарлари, ташкилий шаклидан қатъий назар, барча ташкилотларда ишчиларнинг эмлангандан сўнг иш жойларига киритишга рухсат берилади. Тартибни бузган ташкилот раҳбарларига нисбатан қонун ҳужжатларида белгиланган тартибда қатъий чора кўрилади.
Олий таълим муассасалари талабалари ўртасида таътил давомида коронавирус инфекциясига қарши тўлиқ эмлаш чоралари кўрилади. Ушбу тадбирларга ОТМ раҳбарлари шахсан масъул этиб белгиланади.
«Омикрон» штамми аниқлангани муносабати билан 15 январдан бошлаб мамлакатда бир қатор чекловлар жорий этилади.
Инновацион ривожланиш вазирлиги ҳузуридаги Илғор технологиялар маркази директори Шаҳло Турдиқулова ZF-UZ-VAC 2001 вакцинасининг бустер дозаси «омикрон»дан деярли 100 фоиз ҳимоя қилишини маълум қилди.
Изоҳ (0)