Ижтимоий тармоқларда Қашқадарё вилояти ИИБ ЙҲХБ бошлиғининг ўринбосари инспекторлардан кунига 20 та маъмурий баённома тузиш юкламаси айтилган аудио тарқалди. ИИВ ЙҲХББнинг маълум қилишича, ҳолат юзасидан хизмат текшируви тайинланган.
NasafNews нашри Қашқадарё вилояти ИИБ ЙҲХБ бошлиғининг ўринбосари Шаҳриддин Қўшоқов ва навбатчи Э.Алимов томонидан ЙПХ ходимлари кун давомида 20 та маъмурий баённома расмийлаштириши зарурлиги айтилган мурожаатни эълон қилди.
«Инспекторларга ярим тунда, навбатчилик қилиш билан бирга, уйма-уй юриб қарздорлик ундириш вазифаси ҳам юкланмоқда. Ҳар биримиз бир кунда 20 та баённома тузмасак, раҳбарият кеч соат 23:00 да ‘разбор’ қилади. Биз ҳам одам. Бизда ҳам оила бор. Уйимизга, болаларимиз олдига боргимиз келади. Лекин қўйилган юкламаларни бажараман деб, уйга ярим тун соат 3 ва 4 га кириб келамиз», — дейди инспекторлардан бири.
Маълум бўлишича, топшириқлар, асосан, Қашқадарё вилояти йўл ҳаракати хавфсизлиги бошқармаси бошлиғи ўринбосари Шаҳриддин Қўшоқов томонидан берилади.
«Биз Қашқадарё вилояти ЙҲХБ бир гуруҳ инспекторлари томонидан мурожаат қилишга мажбур бўлдик. Бошлиқ ўринбосари Ш.Қўшоқов томонидан бизга ҳар кун ‘20 та баённома ёзасан, маст ҳайдовчи ушлайсан’ деб юклама қўйилмоқда. Ўзингиз биласиз, бизда алкотестер йўқ. Ҳозир пандемия вақти бўлса, бирор-бир касал юқтириб олсак, нима бўлади? Мана, ҳозир тунги соат 22:58, дам олиш куни, ҳали жавоб бўлгани йўқ», — дея қўшимча қилган яна бир инспектор.
Таъкидланишича, инспекторларга берилаётган 10 фоиз баённома пули ҳам тўхтатиб қўйилган, хизмат автомашиналарига бензин берилмаяпти.
ИИВ ЙҲХББнинг таъкидлашича, ушбу хабар юзасидан ИИВ ЖХД ЙҲХХ томонидан хизмат текшируви ўтказилиши белгиланган.
Аввалроқ собиқ инспектор ички ишлар вазири Пўлат Бобожоновга видеомурожаат йўллагани, у Қува тумани ИИБ раҳбариятининг ноқонуний ҳаракатлари ҳақида гапиргани тўғрисида хабар берилганди. Кейинроқ вилоят ИИБнинг расмий баёнотида қайд этилишича, мурожаатчи муқаддам ички ишлар органларида ишлаб, хизмат вазифасига масъулиятсизлик билан ёндашгани, сурункали равишда хизмат интизомини бузиб, ички ишлар органлари ходимларига номуносиб хатти-ҳаракатлар содир этгани учун салбий сабабларга кўра, 2021 йилда ички ишлар органларидан бўшатилгани маълум қилинган.
Изоҳ (0)