Профессионал бокс бўйича иккинчи ярим енгил вазн (-55,34 кг) тоифасида WBA ва IBF камарлари соҳиби Муроджон «Кака» Аҳмадалиевнинг (10-0, 7 КО) навбатдаги рақиби маълум бўлди. Бу ҳақда BoxingScene хабар қилмоқда.
IBF ташкилоти Аҳмадалиев ва мазкур тоифада мажбурий даъвогар филиппинлик Марлон Тапалес (35-3, 18 КО) ўртасидаги жангни ташкил қилиш борасида қарор чиқарган. Ҳар икки томон вакилларига ўзаро келишувга эришиш учун 2 февралга қадар муҳлат берилган. Агар томонлар келишувга эриша олмаса, жанг ташкилотчиси аукцион орқали аниқланади.
Тапалес сўнгги жангини 2021 йил 11 декабрида япониялик Ҳироаки Тешигаварага қарши ўтказиб, уни иккинчи раундда нокаутга учратганди. Бу орқали филиппинлик боксчи IBF камари учун мажбурий даъвогарга айланган. Аввалроқ у Аҳмадалиевнинг собиқ рақиби Рёсуке Ивасага имкониятни бой берганди.
Аҳмадалиев сўнгги жангини 2021 йилнинг 19 ноябрида Хосе Веласкесга қарши ўтказиб, очколар эвазига ғалаба қозонганди.
Қайд этиш керак IBF қўйган шартга кўра, ҳеч бир боксчи жанг бўлиб ўтадиган санага қадар бошқа жанг учун шартнома тузиши тақиқланади. Бу эса Аҳмадалиевнинг барча камарларни бирлаштириш истагини ортга суради. Шу тариқа Муроджон ва WBC ҳамда WBO камарлари эгаси Стивен Фултон (20-0, 8 КО) ўртасидаги жанг яқин орада ўтказилмайдиган бўлди. Маълумот учун, 2022 йилда Фултонни ҳам мажбурий ҳимоя жанги кутиб турибди.
Изоҳ (0)