Qashqadaryoda tanish ayolga tegishli videolarni tarqatmaslik uchun pul talab qilgan bloger ishi sudda ko‘rib chiqilmoqda

Jinoyat ishlari bo‘yicha Qashqadaryo viloyat sudida o‘zini bloger sifatida tanishtirib, tasvirga olgan videosini internetda tarqatmaslik evaziga ikki million so‘m pul talab qilgan bloger ishi ko‘rib chiqilmoqda. Bu haqda sudda qatnashgan “Daryo” muxbiri xabar berdi.

Sud majlisida ma’lum qilinishicha, o‘zini bloger sifatida tanishtirgan M.R. tanishining iltimosiga ko‘ra, uning turmush o‘rtog‘iga tegishli videolarni YouTube hamda TikTok ijtimoiy tarmog‘ida tarqatgan. Bu esa ayolning sha’nini toptagan. Shundan so‘ng jabrlanuvchi ayol Y.I. sudga da’vo kiritib, aybdor blogerga chora ko‘rilishini so‘ragan.

Dastlabki sud jarayoni va tayinlangan jazoga e’tiroz bildirgan M.R. belgilangan muddatda yuqori instansiyaga shikoyat qilgan. Mazkur shikoyat arizasi 2022-yilning 7-yanvar kunidan boshlab sudya Burhon Turdiyev raisligida ko‘rib chiqilmoqda.

Sud tergovida so‘z olgan ayblanuvchi bloger qilmishidan pushaymonligini, jabrlanuvchining videosini o‘zi tasvirga olmaganini, unga videotasvirlarni jabrlanuvchining turmush o‘rtog‘i berib, internetda tarqatishni iltimos qilganini aytdi. Shuningdek, birinchi instansiya qaroridan noroziligini, unga imkon berilsa, ijtimoiy tarmoqqa chiqargan videosini o‘chirib tashlab, obunachilariga xato qilganini aytib, videomurojaat qilishini ma’lum qildi. Jabrlanuvchi Y.I. esa bunga hojat yo‘qligini, video internetda tarqalib ulgurganini, endi aybdor qilmishiga yarasha jazo olishini xohlayotganini ta’kidladi.

Sud noma’lum muddatga tanaffus e’lon qildi.

Eslatib o‘tamiz, viloyat IIB axborot xizmatining 2021-yilning 1-iyun kuni tarqatgan rasmiy ma’lumotida o‘zini M. bloger sifatida tanishtirgan fuqaro o‘zga shaxslarga tegishli videoni internetda tarqatib yubormaslik evaziga 2 million so‘m talab qilgani ma’lum qilingandi.

“Fuqaro S.S. ariza bilan murojaat qilib, 2021-yil 25-may kuni kech soat 21:00 da Nishon tumani Nuriston mahallasida yashovchi tanishi O. ismli ayolning uyiga borgani, shu kuni kech soat 03:30 da notanish ikki nafar fuqaro xonadonga bostirib kirib, ulardan biri o‘zini ‘M. bloger’ deb tanishtirib, unga ‘ushbu xonadonga nima sababdan kelgansan?’, deb urganini ma’lum qilgan. Shuningdek, telefon apparatida videotasvirga olganini va uni ijtimoiy tarmoqlarda chiqarib yuborib sharmanda qilishini aytib, videotasvirni tarqatmaslik evaziga undan 2 million so‘m pul talab qilib kelgan”, — deyiladi viloyat IIB axborot xizmati tarqatgan ma’lumotda.

Viloyat IIBning qo‘shimcha qilishicha, sudda ishi ko‘rib chiqilayotgan M. ismli shaxs talab qilingan pulning bir million so‘mini olgan vaqtida ushlangan. Va unga nisbatan Nishon tuman IIB huzuridagi tergov bo‘linmasi tomonidan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilib, qamoq ehtiyot chorasi qo‘llanilgan.