Ўзбекистон MMA ассоциацияси вице-президенти Мурод Хонтўраев BMW X5 автомобилида автоҳалокатга учраб, вафот этгани юзасидан очилган жиноий иш тугатилди. Бу ҳақда «Дарё»га Тошкент вилояти ИИББ Тергов бошқармаси маълум қилди.
Маълумот учун, 2021 йилнинг 19 июль санасида Тошкент вилояти, Бўстонлиқ тумани ҳудудидан ўтувчи 4Р-12 автомобиль йўлининг 68-километрида бир йўналишда ҳаракатланиб кетаётган Lacetti ҳамда BMW X5 русумли автомобиллар иштирокида тўқнашув содир бўлган. Тўқнашув оқибатида BMW X5 русумли автомобиль йўлдан чиқиб кетиб ағдарилган.
BMW X5 машинаси ичида Ўзбекистон MMA ассоциацияси вице-президенти Мурод Хонтўраев бўлган. MMA жангчиси воқеа жойида вафот этган. Кейинчалик ушбу ЙТҲ юзасидан жиноят иши қўзғатилган.
Тергов бошқармасининг маълум қилишича, Мурод Хонтўраев билан бирга бўлган ёки ЙТҲнинг бошқа иштирокчиларига ўртача, ўғир жароҳат етмаган ҳамда ўлим ҳолати кузатилмаган.
Шу сабабли айблилик масаласи бўйича Мурод Хонтўраев томонидан йўл ҳаракати қоидаларининг 3, 4, 73, 77 ҳамда 79-банди бузилгани инобатга олиниб, ҳайдовчи Хонтўраев мазкур ЙТҲнинг содир этилишига сабабчи деб топилган.
Унинг ўзи вафот этгани туфайли ва ишда жиноят таркибий элементлари мавжуд бўлмагани инобатга олиниб, олиб борилган дастлабки тергов якунига кўра, Тошкент вилояти ИИББ ҳузуридаги тергов бошқармаси томонидан Мурод Хонтўраев вафоти юзасидан қўзғатилган жиноят иши 2021 йилнинг 30 сентябрь куни Жиноят процессуал кодексининг 83-моддаси 2-бандига (ишда жиноят таркибий элементлари мавжуд бўлмаса, айбсиз деб топиш) асосан ҳаракатдан тугатилган.
Изоҳ (0)