Фергюсон билан бирга ишлаган Йозе Марино, хоккей бўйича Жаҳон чемпиони Бразилия, «Барселона» — Италия клуби. Футбол оламидаги энг ғалати иқтибослар

4 январь, сешанба куни россиялик машҳур миллиардер Борис Ротенбергнинг ўғли Роман Ротенберг «СКА» хоккей клуби бош мураббийига айланди. Бу хабар спорт жамоатчилигини карахт аҳволга тушириб қўйди. Чунки Роман Ротенберг мураббийликка қадар «СКА» клубининг биринчи вице-президенти лавозимида ишлаб келарди. Кўпчилик мухлис-у мутахассислар эса уни мураббийга айланишини тасаввур ҳам қилмаганди.

Барча муҳокама ва танқидлар билан банд бўлиб турган бир пайтда, «СКА» клуби Роман Ротенберг қўл остида илк ўйинни КХЛ доирасида «Кунлун» жамоасига қарши ўтказиб, 5:1 ҳисобида ғалаба қозонди. Ўйиндан кейин эса Романга нима сабабдан бош мураббий бўлишга қарор қилгани ҳақида савол берилди. Унинг жавобини узоқ йиллар эслаб юриладиган иқтибослар рўйхатига киритса бўлади:

«Йозе Марино мураббийлик фаолиятини қандай бошлаганини биласиз. У Алекс Фергюсонга таржимонлик қилган. Оддий таржимон сифатида Фергюсоннинг барча тажрибасини ўзлаштириб олиб, муваффақиятли мураббийга айланди. Тарихда бундай мураббийлар кўп», — деди Роман Ротенберг.

Албатта, Ротенберг «Йозе Марино» деганда португалиялик мураббий Жозе Моуриньони назарда тутган. Аммо иқтибоснинг энг кулгили жойи бунда ҳам эмас. Гап шундаки, Моуриньо фаолияти давомида Фергюсонга эмас, бошқа британиялик машҳур мураббий Бобби Робсонга таржимонлик қилган. Фергюсон билан умуман бирга ишламаган.

Гап футболдаги энг кулгили ва ғалати иқтибослар ҳақида кетар экан, «Дарё» футбол тарихидаги ана шундай энг сара иқтибосларни эсга олишга қарор қилди.

Қачон Бразилия терма жамоаси хоккейда жаҳон чемпиони бўлса, шундагина Россия терма жамоаси футбол бўйича жаҳон чемпиони бўла олади.

Пеле

Албатта, мен Шекспир китобини ўқиганман. Фақат муаллифи кимлиги эсимда йўқ.

Франческо Тотти

Биз мағлубиятга учрадик, чунки ғалаба қозона олмадик.

Роналдо

Жароҳатлар мени изма-из таъқиб қилиб юрибди. Улардан қандай қутулишни билмаяпман. Балки уларга мени дастхатим керакдир?

Алессандро дел Пьеро

Агар сиз одамларга ёқсангиз — сиз энг яхшисиз. Агар одамлар сиздан нафратланишса, унда сиз энг зўрисиз.

Жозе Моуриньо

Мен жон деб бирор Италия клубида ўйнаган бўлардим. Масалан, «Барселона»да

Марк Дрейпер

Ўйин натижаси ҳақидаги тахминларни қилишнинг энг яхши пайти — бу ўйин тугагандан кейинги пайт.

Жоао Домингос Пинту

Ҳар бир ўйинда мағлубиятга учрасак ҳам майли. Чемпионатни юцак бўлди.

Марк Видука

Мессининг ўйинини кўриб, қаердан ҳам футболни танладим, деб ўйланиб қоласан киши.

Андрей Аршавин

Ўйиннинг 99 фоизида биз устунликка эга бўлдик. Аммо қолган 3 фоизи бизга қимматга тушди.

Руд Гуллит

Италияда ўйнаш менга ёқмади. Ўзимни худди бошқа мамлакатга келиб қолгандек ҳис қиляпман.

Уэльслик Иан Раш

Мен дунёдаги энг зўр мураббиймасман. Аммо мендан зўрроқ мураббий бор деб ўйламайман.

Жозе Моуриньо

Футбол қоидалари жуда оддий: агар ҳаракатланяптими — ур, агар қимирламаётган бўлса ҳаракатни бошлаб қолмаслиги учун ур.

Дэвид Бекҳэм

Менинг фалсафам: тўп йўқми — пас йўқ, пас йўқми — назорат йўқ, назорат йўқми — футбол йўқ. Тўпдан тезроқ югурушнинг иложиси йўқ.

Пеп Гвардиола

Нима учун гол киритганимдан кейин уни нишонламайман? Чунки бу менинг ишим. Почталён ҳар сафар хатни эгасига етказиб берганида қарсак чалиб, осмонга сакрамайдику?!

Марио Балотелли