Sobiq MMA jangchisi Murod Xonto‘rayev avtohalokatga uchrab, vafot etgani to‘g‘risida xabar berilgandi. Ushbu YTH bo‘yicha “Daryo” so‘roviga ko‘ra Toshkent viloyati Ichki ishlar bosh boshqarmasi huzuridagi Tergov boshqarmasi tomonidan ma’lumot taqdim etildi.
Foto: Telegram
Qayd etilishicha, 2021-yil 19-iyul kuni soat taxminan 11:00 larda 1987-yilda tug‘ilgan, Murod Xonto‘rayev Maxamadusmanovich o‘ziga tegishli BMW X5 XDRIVE40I rusumli, davlat raqami 01R 007 HA bo‘lgan avtomashinani Bo‘stonliq tumani, Qoranqul qishlog‘i hududidan o‘tgan 4R6 Bektemir–Chorbog‘ avtomobil yo‘lining 68-kilometrida Bektemir yo‘nalishi bo‘ylab boshqarib borayotib o‘zi bilan bir yo‘nalishda, oldinda harakatlanib ketayotgan, 1984-yilda tug‘ilgan, Azamat Usmanov Abdusamatovichning boshqaruvidagi, ishonchnoma orqali boshqarayotgan fuqaro O‘ktam Usmanov Mirzayevichga tegishli, Lacetti rusumli, davlat raqam belgisi 20M 212 DA bo‘lgan avtomashinaning orqa chap burchagiga to‘qnashgan.
Shundan so‘ng avtomashina rul boshqaruvini yo‘qotib, yo‘nalishi bo‘yicha yo‘lning o‘ng chetidagi pastlikda joylashgan makkajo‘xori dala yer maydoniga ag‘darilib tushib ketgan.
Oqibatda haydovchi Murod Xonto‘rayev tan jarohatlari olib hodisa joyida vafot etgan.
Shuningdek, ushbu avtomashina old o‘rindig‘ida bo‘lgan yo‘lovchi, 1995-yilda tug‘ilgan, Jasurbek Anorboyev Baxtiyor o‘g‘li “bosh miya yopiq jarohati, miya chayqalishi, yuz qismi hamda ko‘krak qafasida lat yeyish, qon talash” kabi tan jarohatlari bilan RSHTYoIMga yotqizilgan.
Mazkur holat yuzasidan Bo‘stonliq tumani IIB huzuridagi Tergov bo‘limi tomonidan 2021-yil 19-iyulda Jinoyat kodeksining 266-moddasi 2-qismi (odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Jinoyat ishi 2021-yil 22-iyulda Toshkent viloyati IIBB huzuridagi Tergov boshqarmasi tomonidan ish yurituviga olingan hamda hozirda dastlabki tergov harakatlari olib borilmoqda.
