Qozog‘istonning Fly Arystan aviakompaniyasiga tegishli Turkistondan Istanbulga uchayotgan samolyoti Urganchga favqulodda qo‘ndi. Bu haqda Telegram’dagi “Novosti Tashkentskogo neba” kanali xabar berdi.
Qayd etilishicha, Qozog‘iston loukoster aviakompaniyasi KC7425 yo‘lovchi samolyoti ekipaji 4-yanvar kuni Urganch zaxira aeroportga qo‘nish haqida qaror qabul qilgan.
Uzbekistan Airports matbuot xizmati holat yuzasidan rasmiy ma’lumot berib, samolyotning favqulodda qo‘nishiga yo‘lovchilardan biri — Turkiya fuqarosiga shoshilinch tibbiy yordam zarurligi sabab bo‘lganini ma’lum qildi.
Shu sababli ekipaj soat 18:05 da bortida 150 nafar yo‘lovchi bo‘lgan samolyotni yaqin oradagi aeroportga qo‘ndirishga qaror qilgan. Samolyot aeroportga qo‘nganidan so‘ng yo‘lovchi tez tibbiy yordam mashinasida olib ketilib, malakali tibbiy yordam ko‘rsatish uchun Urganchdagi tibbiyot muassasasiga yotqizilgan.
Fly Arystan samolyoti o‘z manzili — Istanbulga yaqin soatlarda uchadi.
Eslatib o‘tamiz, 2021-yil may oyidagi kelishuvga muvofiq Air Astana aviakompaniyasi tarkibiga kiruvchi Fly Arystan aviakompaniyasi tomonidan 21-iyundan boshlab Turkiston—Toshkent—Turkiston yo‘nalishida haftasiga 2 marotaba qatnov yo‘lga qo‘yilgan.
Izoh (0)