Афғонистон ва Туркманистон чегарасида «Толибон» ҳаракати жангарилари ва туркманистонлик чегарачилар ўртасида қуролли тўқнашувлар бўлиб ўтди. Бу ҳақда Афғонистоннинг Hasht-e subh газетасига таяниб, «ТАСС» хабар берди.

Фото: «Меdiа.аz»

«Уч кун олдин Туркманистон чегара хизмати ходимлари бир фуқарони ўлдириб, иккинчисини калтаклаган. Ҳодиса юзасидан олиб борилаётган тергов чоғида уларнинг ҳаракатларига жавобан ‘Толибон’ жангарилари ўқ узган», — деди Афғонистон шимолидаги Жузжон вилоятининг «Толибон» томонидан тайинланган ахборот ва маданият бўлими бошлиғи Ҳилол Балхий.

Қайд этилишича, Туркманистон чегарачилари ва «Толибон» ўртасида 3 январь куни эрталаб Жузжон вилоятининг Ҳамаб туманида отишма содир бўлган. Ҳодисанинг бошқа тафсилотлари ҳақида хабар берилмаган.

2021 йил 1 декабрь куни Эрон ва Афғонистон чегарасида Эрон армияси ва «Толибон» ҳаракати ўртасида жанговар тўқнашувлар содир бўлганди. Бунга толиблар чегара аниқ қаердан ўтганини билмагани сабаб бўлган.

Шунингдек, декабрь ойида Афғонистон-Покистон чегараларида ҳам «Толибон» жангарилари иштирокида шунга ўхшаш воқеалар содир бўлган.