Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева 17 ёшли Нодирбек Абдусатторов шахмат бўйича 5 карра жаҳон чемпиони Магнус Карлсенни мағлубиятга учратгани муносабати билан уни табриклаб, пост ёзди.
«17 ёшли ҳамюртимиз Нодирбек Абдусатторов 5 карра жаҳон чемпиони Магнус Карлсен устидан ғалаба қозонди! Карлсен иккинчи бор ўзбекистонлик ёшларимизга мағлуб бўлмоқда!
Баракалла, Нодирбек! Сен Ўзбекистон номини дунёга танитяпсан. Эсимда бор, Нодирбек ‘Заковат гамбит’ турнирида ҳам ғолиби бўлганди. Бугунги ғалабадан фахрландим!
Газни бос, Нодирбек! БИЗ СЕН БИЛАН! ФАҚАТ ОLG‘А! БИЗ СЕН БИЛАН ФАХРЛАНАМИЗ», – деб ёзади Мирзиёева.
Маълумот учун, Польша пойтахти Варшава шаҳрида шахматнинг блиц ва рапид йўналишлари бўйича жаҳон чемпионати бўлиб ўтмоқда. Унда иштирок этаётган ўзбекистонлик Нодирбек Абдусатторов (2593) 5 карра жаҳон чемпиони Магнус Карлсенга (2842) қарши дона сурди ва сенсацион ғалабага эришди.
10-тур доирасидан ўрин олган ушбу баҳс турнир жадвалидаги яққол пешқадамликни аниқлаб бериши билан аҳамиятли эди. Боиси бунгача Карлсен 7,5 очко билан биринчи, 17 ёшли Абдусатторов эса 7 очко билан иккинчи поғонани эгаллаб турган эди. Шу тариқа Абдусатторов ушбу ғалабадан кейин бош соврин сари дадил қадам ташлади.
Рапид йўналишида яна 3 турдан сўнг ғолиб аниқланади. Агар Нодирбек қолган беллашувларда ҳам пешқадамликни сақлаб қола олса, ушбу йўналиш бўйича жаҳон чемпионига айланади.
Эслатиб ўтамиз, 2018 йил декабрь ойида 16 ёшли Шамсиддин Воҳидов ҳам жаҳоннинг биринчи рақамли шахматчисини мағлуб қилганди.
Изоҳ (0)