Қозоғистоннинг Олмаота вилояти ҳудудидан ўтган Олмаота—Бишкек автомобиль йўлида ичида ўзбекистонликлар бўлган автобус ва Mercedes автомобили иштирокида йўл-транспорт ҳодисаси содир бўлгани ҳақида хабар берилганди.
Ўзбекистоннинг Олмаотадаги Бош консулхонаси маълумотига кўра, автобусдаги 33 нафар йўловчидан 30 нафари Ўзбекистон фуқаролари бўлган.
Қайд этилишича, Mercedes-Benz E-Class русумли машина ҳайдовчиси йўлни муз қоплагани сабабли автомобиль бошқарувини йўқотган, бунинг оқибатида қарама қарши йўналишдан келаётган автобус билан тўқнашув содир бўлган.
Енгил машинада бўлган олти йўловчидан уч нафари воқеа жойида ҳалок бўлган, яна уч нафари эса турли даражадаги жароҳатлар билан шифохонага ётқизилган. Автобусда бўлганлардан фақат унинг ҳайдовчиси жароҳатланган.
Вазият зудлик билан Бош консулхона назоратига олинди. Зарур ҳаракатлар амалга оширилгач, воқеа жойига бошқа бир автобус олиб келинган. Ушбу автобусда барча ўзбекистонликлар хавфсиз тарзда Тошкентга жўнатилган. Улар 28 декабрь куни Ўзбекистон чегарасини кесиб ўтди, дея аниқлик киритди Бош консулхона.
Маълумотга кўра, маҳаллий ҳокимият органлари ушбу йўл-транспорт ҳодисаси бўйича тергов ишларини олиб бормоқда.
Изоҳ (0)