Наманган вилояти Чуст тумани ҳокимлигининг учта хизмат автомобили йиғилиб қолган қарздорликлари сабаб жарима майдончасига жойлаштирилди. Бу ҳақда вилояти ИИБ ЙҲХБ ахборот хизмати хабар берди.
«Kun.uz» нашри 23 декабрь куни ушбу автомобиллар йўл ҳаракати қоидаларини бузгани учун ўнлаб жарималарни тўламай келаётганини ёзганди. Таъкидланишича, машиналарга нисбатан тузилган айрим далолатномалар 2018 йилга тегишли.
Қоидабузарликлар фото ва видео қайд этишнинг автоматлаштирилган воситалари орқали аниқланган бўлиб, улар тезликни ошириш ва светофорнинг қизил чироғида ўтиш билан боғлиқ бўлган.
Эътиборли жиҳати учта автомобилнинг ҳам давлат рақамида 234 сонлари мавжуд. Уларнинг иккаласидаги рақамлар 2021 йилда давлат органлари учун мўлжалланган DAV сериялари чиққач, алмашган. Автомобиллардан бири — Trailblazer — «Namangan To‘qimachi Cluster»га тегишли, бироқ нашр манбасига кўра, ундан туман ҳокими Бекзод Ҳамдамов фойдаланиб келади. Бу давлат хизматчиларининг хизмат автомобиллари нархи чеклангани билан боғлиқ бўлиши мумкин.
Вилоят ЙҲХБ маълумотларига кўра, ҳозирда давлат рақам белгиси 50 066 DAV (аввалги рақами 50 234 НАА) бўлган Cobalt автомашинасининг аниқланган қоидабузарликлари учун белгилангна 17 та жариманинг умумий суммаси 7 626 000 сўмни ташкил этади.
Шунингдек, давлат рақам белгиси 50 068 DAV (аввалги рақами 234 ТАА) бўлган Nexia-3 автомашинага белгиланган 15 та жарималар суммаси 5 302 900 сўмга тенг. Ушбу машина туман ҳокимининг биринчи ўринбосари Жамшид Баҳодировга бириктирилган. Машинада асосдан тезлик меъёрларига риоя қилинмаган, иккита ҳолатда автомобиль соатига 112 километр тезликда ҳаракатлангани қайд этилган. Бундан ташқари, светофорнинг тақиқловчи сигналида ҳаракатлангани аниқланган.
Давлат рақам белгиси 50 234 МBA бўлган Trailblazer автомашинанинг (фото ва видео) қайд этиш мосламаларида аниқланган қоидабузарликларига белгиланган 10 та жарима суммаси 7 775 000 сўмни ташкил этмоқда. Барча қоидабузарликлар тезликни ошириш билан боғлиқ.
ЙҲХБнинг маълум қилишича, қарздорлик тўла ундирилгунга қадар автомашиналар жарима майдонига жойлаштирилган. Кейинроқ идора машиналар жарима майдонига жойлаштирилганидан кейин, қарздорлик тўлиқ тўланганини билдирган.
Изоҳ (0)