Namangan viloyati Chust tumani hokimligining uchta xizmat avtomobili yig‘ilib qolgan qarzdorliklari sabab jarima maydonchasiga joylashtirildi. Bu haqda viloyati IIB YHXB axborot xizmati xabar berdi.
“Kun.uz” nashri 23-dekabr kuni ushbu avtomobillar yo‘l harakati qoidalarini buzgani uchun o‘nlab jarimalarni to‘lamay kelayotganini yozgandi. Ta’kidlanishicha, mashinalarga nisbatan tuzilgan ayrim dalolatnomalar 2018-yilga tegishli.
Qoidabuzarliklar foto va video qayd etishning avtomatlashtirilgan vositalari orqali aniqlangan bo‘lib, ular tezlikni oshirish va svetoforning qizil chirog‘ida o‘tish bilan bog‘liq bo‘lgan.
E’tiborli jihati uchta avtomobilning ham davlat raqamida 234 sonlari mavjud. Ularning ikkalasidagi raqamlar 2021-yilda davlat organlari uchun mo‘ljallangan DAV seriyalari chiqqach, almashgan. Avtomobillardan biri — Trailblazer — “Namangan To‘qimachi Cluster”ga tegishli, biroq nashr manbasiga ko‘ra, undan tuman hokimi Bekzod Hamdamov foydalanib keladi. Bu davlat xizmatchilarining xizmat avtomobillari narxi cheklangani bilan bog‘liq bo‘lishi mumkin.
Viloyat YHXB ma’lumotlariga ko‘ra, hozirda davlat raqam belgisi 50 066 DAV (avvalgi raqami 50 234 NAA) bo‘lgan Cobalt avtomashinasining aniqlangan qoidabuzarliklari uchun belgilangna 17 ta jarimaning umumiy summasi 7 626 000 so‘mni tashkil etadi.
Shuningdek, davlat raqam belgisi 50 068 DAV (avvalgi raqami 234 TAA) bo‘lgan Nexia-3 avtomashinaga belgilangan 15 ta jarimalar summasi 5 302 900 so‘mga teng. Ushbu mashina tuman hokimining birinchi o‘rinbosari Jamshid Bahodirovga biriktirilgan. Mashinada asosdan tezlik me’yorlariga rioya qilinmagan, ikkita holatda avtomobil soatiga 112 kilometr tezlikda harakatlangani qayd etilgan. Bundan tashqari, svetoforning taqiqlovchi signalida harakatlangani aniqlangan.
Davlat raqam belgisi 50 234 MBA bo‘lgan Trailblazer avtomashinaning (foto va video) qayd etish moslamalarida aniqlangan qoidabuzarliklariga belgilangan 10 ta jarima summasi 7 775 000 so‘mni tashkil etmoqda. Barcha qoidabuzarliklar tezlikni oshirish bilan bog‘liq.
YHXBning ma’lum qilishicha, qarzdorlik to‘la undirilgunga qadar avtomashinalar jarima maydoniga joylashtirilgan. Keyinroq idora mashinalar jarima maydoniga joylashtirilganidan keyin, qarzdorlik to‘liq to‘langanini bildirgan.
Izoh (0)