Зўравонликка қарши курашувчи «Nemolchi.uz» лойиҳаси 27 декабрь куни ижтимоий тармоқларда Тошкент давлат педагогика университети талабаси Муштарийбону Комилованинг интим видеолари тарқалганини маълум қилди. Октябрь охирида у декан ўринбосари Боғабек Йўлдошев томонидан тегажоғликка учраб, иккинчи қават деразасидан итариб юборилганини билдирганди.
Таъкидланишича, қиз ушбу видеони ўтган қиш ёки баҳорда йигитига юборган. «Тўғри, айрим каналлар қиз уни декан ўринбосарига юборган деб ёзмоқда», — дейилади хабарда.
Кузда Муштарийбону телефонини Фахриддин исмли терговчига текширув учун топширган. Декабрь бошида эса, лойиҳа маълумотларига кўра, Фахриддин Муштарийбонуга тергов ишига алоқадор бўлмаган, шахсий характердаги хабарларни юборган. Кейинчалик ёзишмалар ўчириб ташланган.
«Биз ушбу скриншотларни ИИВ Тергов бошқармасига (терговчи унинг дугонасига юборган қўшимча маълумотларни ҳам) юбордик ва ушбу терговчини ишдан четлатиш ёки бўшатишни сўрадик», — дейилади «Nemolchi.uz» хабарида.
«Икки ҳафта олдин у терговдан четлаштирилган. Бугун видео пайдо бўлди», — дея маълум қилади лойиҳа.
«Nemolchi.uz» лойиҳаси бу борада юзага келган саволни ўртага ташлаган: «ИИВ терговчиси терговга қадар текширув маълумотларини ноқонуний тарқатмоқдами?». Лойиҳа таҳририяти ИИВ қизнинг шаънига доғ туширадиган маълумотларни тарқатган барчани Жиноят кодексининг тегишли моддалари билан жавобгарликка тортишига умид билдирмоқда.
«Gazeta.uz»нинг Тошкент шаҳар ИИББга таяниб ёзишича, ушбу терговчига нисбатан хизмат текшируви тайинланган бўлиб, унинг натижаларига кўра тегишли чоралар кўрилади. Шу билан бирга пойтахт ИИББ видеони терговчи тарқатмаганини қайд этган.
«Жабрланувчининг телефонини кўздан кечириш давомида интим характерга эга ролик топилмаган. Видео терговчи томонидан тарқатилмаган», — дейилади идора изоҳида.
Воқеа юзасидан Саида Мирзиёева ва Комил Алламжонов муносабат билдириб ўтганди. Саида Мирзиёева бундай ҳолатларни доимо жамоатчиликка маълум қилиб турилиши учун Сенат, Бош прокуратура, ИИВ ва ОАВнинг ҳаракатини бирлаштирадиган йирик лойиҳа зарурлигини билдириб ўтди. Комил Алламжонов бу фикрга қўшилишини маълум қилди.
Изоҳ (0)