“Tolibon” Afg‘onistonda hokimiyat tepasiga kelgach 100 dan ortiq sobiq afg‘on harbiylari o‘ldirilgan yoki bedarak yo‘qolgan. Bu haqda Human Rights Watch (HRW) hisobotiga tayanib, “Korrespondent.net” xabar berdi.

Foto: EPA

Inson huquqlarini himoya qilish guruhi “Tolibon”ning harbiylar va politsiyachilarga amnistiya qo‘llash borasidagi va’dasini shubha ostiga olgan, shuningdek, toliblarni qasos olish maqsadida qotilliklarni rejalashtirish va tashkillashtirishda ayblamoqda.

“‘Tolibon’ rahbariyati tomonidan va’da qilingan amnistiya dala komandirlarini afg‘on armiyasining sobiq harbiylarini qatl etish va o‘g‘irlab ketishdan to‘xtatib qolmadi. Qotilliklar davom etishi va o‘ldirilganlarning oilasi biror kompensatsiya olish-olmasligi faqat ‘Tolibon’ga bog‘liq”, — deydi HRW’ning mintaqaviy bo‘linma boshlig‘i Patrisiya Gosman.

Ta’kidlanishicha, “Tolibon” hokimiyat tepasiga kelganidan so‘ng, qotilliklar kamida to‘rtta viloyatda davom etmoqda: G‘azni, Hilmond, Qunduz va Qandahor. Hozirga qadar 100 dan ortiq sobiq harbiylar o‘ldirilgani va bedarak yo‘qolgani ma’lum.

Inson huquqlari himoyachilarining ma’lumotlariga ko‘ra, sobiq harbiylarni aniqlashda ularni yolg‘on bilan maxsus ro‘yxatdan o‘tishga majbur qilishgan. Shuningdek, “Tolibon” oldingi hukumatdan qolgan armiya va politsiya shaxsiy tarkibi ro‘yxatidan foydalangan.

O‘z navbatida “Tolibon” qotilliklar borasidagi ayblovlarni rad etmoqda.

Avvalroq Afg‘onistonda “Tolibon” aholining smartfonlarini tekshirib, musiqa va video olib yurganlarni kaltaklayotgani xabar qilingandi. “Tolibon” islom shariatining fundamentalistik talqiniga amal qiladi. 1996-yildan 2001-yilgacha bo‘lgan davrda ham Afg‘onistonni boshqargan “Tolibon” o‘sha paytda musiqa, mustaqil ommaviy axborot vositalari va ko‘plab sport turlarini taqiqlagan. Ayollarga ishlash, qizlarga esa maktabga borish man etilgan. “Tolibon”, shuningdek,  erkaklarni ibodat qilishga va soqol o‘stirishga majburlagan.