Қашқадарё вилояти Қарши шаҳрида 20 декабрь куни собиқ турмуш ўртоғининг шахсига оид маълумотлари ва экспертиза ҳужжатларини тарқатиб юбормаслик учун пул талаб қилган фуқаро ушланди. Бу ҳақда Тергов департаменти хабар қилди.
Маълум қилинишича, шу куни Қарши шаҳар ИИО ФМБ бошлиғи номига Б.М. исмли аёл (1998 йилда туғилган) ариза билан мурожаат қилган. У собиқ турмуш ўртоғи Й.Ф. (1997 йилда туғилган) унинг шахсига оид маълумотлар ва экспертиза ҳужжатларини ўқиш ва иш жойи, ижтимоий тармоқларга тарқатиб юбориш билан қўрқитиб, маълумотларни ошкор қилмаслик эвазига 5 минг доллар сўраётганини маълум қилган.
Ўтказилган тезкор тадбир давомида Й.Ф. Қарши шаҳридаги «Яшил бозор» савдо дўкони ёнида фуқаро Б.М.дан махсус кимёвий ишлов берилган 2500 долларни олган вақтида ушланиб, пул маблағлари ашёвий далил тариқасида расмийлаштириб олинган.
Ҳолат юзасидан Й.Ф.га нисбатан Жиноят кодексининг 165-моддаси 1-қисми (товламачилик) билан жиноят иши қўзғатилиб, у гумон қилинувчи тариқасида жалб қилинган. Мазкур жиноятни содир этган шахс уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.
Мавзуга доир:
- Тошкентда танишининг номақбул фото ва видеоларини тарқатмаслик учун ундан 5 млн сўм сўраган 21 ёшли йигит ушланди
- Тошкентда қизнинг кийимсиз ҳолдаги видеосини тарқатмаслик учун ундан 5 минг доллар талаб қилган шахсга ҳукм ўқилди
- Хоразмда Instagram’даги обрўсизлантирувчи расмларни ўчириш эвазига 5 минг доллар сўраган шахс ушланди
Изоҳ (0)