Президент Шавкат Мирзиёев Uzbekistan GTL заводи очилиш маросимида бу завод вилоят иқтисодиётига қандай таъсир қилишини айтиб ўтди. Шунингдек, вилоятда режалаштирилган йирик лойиҳалар ҳақида маълумот берди.
«Ушбу янги мажмуаларнинг ишга тушиши, ҳеч шубҳасиз, Қашқадарё вилояти иқтисодиёти ривожига ҳам сезиларли таъсир кўрсатади. Воҳада саноат ишлаб чиқариш ҳажми 1,4 баробарга ошади, ялпи ҳудудий маҳсулот эса 7 фоизга ўсади.
Бу Қашқадарё вилоятининг умумий экспорт кўрсаткичини 2 баробар кўпайтириш имконини беради.
Очиғини айтиш керак, Қашқадарё вилояти жуда бой хом ашё ресурсларига эга бўлишига қарамай, кўп йиллар давомида унинг тайёр саноат маҳсулоти ишлаб чиқаришдаги ҳиссаси паст бўлиб қолаётган эди.
Шунинг учун охирги йилларда вилоятда маҳаллий саноатнинг тўқимачилик, қурилиш материаллари, чарм, электротехника, озиқ-овқат каби соҳаларида қиймати қарийб 9 триллион сўмлик 1 минг 700 тага яқин лойиҳа ишга туширилди.
Натижада сўнгги уч йилда вилоятда тайёр саноат маҳсулотлари ишлаб чиқариш ҳажми 1,3 баробарга ошди.
Келгуси йилларда ҳам Қашқадарё вилоятини барча йўналишларда ривожлантириш бўйича кенг кўламли режаларни ишлаб чиққанмиз. Хусусан, нефть-газ соҳасида қиймати 140 миллион доллар бўлган яна 3 та лойиҳа амалга оширилади.
Муборак газни қайта ишлаш заводида 135 миллион доллар эвазига олтингугурт олиш қурилмасининг қуввати тикланади. Энергетика соҳасида 1,3 миллиард доллар инвестициялар ҳисобидан жами 1 минг 250 мегаваттга тенг янги электр энергияси ишлаб чиқариш қувватлари барпо этилади.
Мисол учун, Ғузор туманида 2025 йилда қуввати 300 мегаватт бўлган қуёш электр станцияси фойдаланишга топширилади. Талимаржон иссиқлик электр станциясида умумий қуввати 900 мегаватт бўлган навбатдаги иккита буғ-газ қурилмаси ишга туширилади. Оқсув дарёсида умумий қуввати 24 мегаватт бўлган 3 та кичик гидроэлектр станцияси барпо этилади.
Ушбу янги қувватлар йилига 8 миллиард киловатт/соат электр энергияси ишлаб чиқариш ва 1,6 миллиард куб метр табиий газни тежаш имконини беради.
Шу билан бирга, вилоят учун «драйвер» бўлган маҳаллий саноат тармоқларида 900 га яқин лойиҳа доирасида 2,7 миллиард долларлик инвестициялар фаол жалб қилинади.
Жумладан, Нишон, Касби, Миришкор ва Яккабоғ туманларида тўқимачилик, Китоб, Қамаши, Деҳқонобод ва Чироқчи туманларида қурилиш материаллари; Миришкор, Китоб туманлари ва Қарши шаҳрида чарм, электротехника саноати; Шаҳрисабз шаҳри ва Қарши туманида мебель; Чироқчи, Нишон ва Косон туманларида озиқ-овқат саноати бўйича лойиҳалар амалга оширилади», – дейди президент.
Мавзуга доир:
- Шавкат Мирзиёев Uzbekistan GTL заводида 1,3 мингта мутахассис юқори даромадли, доимий иш ўрнига эга бўлишини маълум қилди
- «Заводда ишлаб чиқариладиган маҳсулотлар жаҳондаги энг юқори экологик талаблар, норма ва стандартларга тўлиқ жавоб беради» — Шавкат Мирзиёев Uzbekistan GTL ҳақида
- «GTL заводида инновацион ечим: ўзини ўзи электр энергияси билан таъминлайди» – Шавкат Мирзиёев
Изоҳ (0)