Шавкат Мирзиёев Uzbekistan GTL заводи очилиш маросимида сўзлаган нутқида унда яратиладиган иш ўринлари ҳақида маълумот бериб кетди.
«Заводни ишга тушириш орқали ‘яшил иқтисодиёт’ сари яна бир жиддий қадам қўймоқдамиз.
GTL заводи ишлаб чиқарадиган ёқилғи бошқа анъанавий ёқилғиларга нисбатан 40 фоиз кам чиқинди ва зарарли газ ҳосил қилади. Бунинг ҳисобидан йилига 13,5 минг тонна зарарли газларнинг ҳавога тарқалишига йўл қўйилмайди.
Биз учун яна бир ўта муҳим томони шундаки, завод ишга тушганидан кейин жами 1 минг 300 та мутахассис юқори даромадли, доимий иш ўрнига эга бўлади.
Мени қувонтирадиган яна бир жиҳат – завод қурилишида қатнашган мутахассисларнинг қарийб 80 фоизи ўзимизнинг маҳаллий кадрлар, хусусан, янгича ишлашга чанқоқ, азм-у шижоатли ёшларимиздир.
Заводнинг қурилиши маҳаллий қурувчи ва муҳандисларнинг янги авлодини тайёрлашга замин яратиб, уларга энг илғор технологияларни ўзлаштириш имконини бергани ҳам ғоят аҳамиятлидир.
Ана шу тажриба келгусида мамлакатимизда янги саноат объектларини ўз кучимиз билан барпо этишда албатта жуда керак бўлади. Бу ёшлар – Янги Ўзбекистон ёшлари. Улар миллий саноатимиз равнақига муносиб ҳисса қўшиб, бу йўлда ‘олтин фонд’имизга айланади, деб ишонаман», — деди президент.
Мавзуга доир:
- «GTL заводида инновацион ечим: ўзини ўзи электр энергияси билан таъминлайди» – Шавкат Мирзиёев
- «Бундай йирик мажмуа шу пайтгача жаҳонда фақат 4 та давлатда барпо этилган». Шавкат Мирзиёев GTL заводининг очилиш маросимида нутқ сўзламоқда
- «Энди газимизни арзон-гаровга четга сотмасдан, ўзимиз қайта ишлаймиз ва кўпроқ даромад оламиз» — Шавкат Мирзиёев
Изоҳ (0)