Нима учун мазкур қишки таътилни уйда ўтказиш кераклиги ҳақида «Домашний очаг» нашри маълумот бериб ўтади.
Бола бирданига кўп таассуротларни қабул қила олмаслиги мумкин
Қандайдир шоу, кейин пицца тайёрлаш бўйича маҳорат дарси, эртасига эса арча томоша қилиш, қолаверса, меҳмонга бориш болани зериктириб қўймаслиги аниқ. Аммо шу билан бирга, боланинг психикаси бунчалик кўп таассуротни қабул қила олмаслиги, шунинг ҳисобига завқлана олмаслиги мумкин. Бундай зўриқиш боланинг кайфияти тушиши, инжиқлиги ва уйқусининг ёмонлашиши билан намоён бўлади.
Янги йилга тайёргарликни анча аввалдан бошлаганингиз, байрам дастурхонини безаш учун ширинликлардан ташқари, эрта туриб фарзандларингизга нонушта тайёрлаганингиз, уйингизни тартибга келтирганингиз, ишлар билан шуғулланишдан ташқари, орада бошқа юмушлар билан ҳам машғул бўлганингизга шубҳа йўқ. Шуларни инобатга олиб айтиш мумкинки, нафақат болалар, балки сизнинг ҳам таътилда одамга ўхшаб дам олишга: севимли китобингизни мутолаа қилиш, телевизор томоша қилиш ва истаганингиздек кўнгил ёзишга ҳаққингиз бор.
Болани ўз ҳолига қўйинг
Таътилда болани кўнгилочар масканларга олиб бориш кераклиги рост, аммо бу доимий бўлиши шарт эмас. Ундан кўра хоҳишига қараб фойдали машғулот билан шуғулланиши, янги тилдаги сўзларни ёдлаши, сурат чизишига қўйиб беринг. Боланинг психикаси соғлом бўлиши учун унга доимий равишда фойдали машғулотлар топиб беришингиз эмас, ўзингиз намуна бўлишингиз муҳимроқ. Унинг соатма-соат нима қилишини белгилаб бермасдан, мустақил равишда шуғулланиши учун ўз ҳолига қўйинг. Бу келажакда ўзини ўзи эплай олишига ҳисса қўшади. Қанчалик ғалати туюлмасин, баъзида ҳеч нима билан шуғулланмаслик ҳам бола учун фойдали бўлиши, бу вақтда муҳим ички жараёнлар кечиши: ўзини ўзи англашга уриниши, нимани ёқтиришини билишга ҳаракат қилиши, қабул қилган маълумотлардан келиб чиқиб фикрлаши ва орзу қилиши мумкин.
Уйда ҳам аъло даражада дам олиш мумкин
Қаергадир бориш кераклиги ҳақида ўйлаб, таътил қандай ўтиб кетиб қолганини билмай қолишингиз мумкин. Бу фурсат бир зумда ўтиб кетиши, вақти келиб эса шунчаки хотира бўлиб қолади. Болангиз билан биргаликда таом тайёрлашингиз, стол теннис ўйнашингиз ва бу вақтда суҳбат қуринг.
Вируслар хавф солмайди
Пандемия ҳали тугамагани сабаб ҳам оммавий тадбирларда қатнашмай турганингиз яхши. Кўнгил очиш учун борган арча байрамда болангиз касал орттириб олишини хоҳламасангиз, уйда вақтни мароқли ўтказиш учун шароит яратинг ва таътилнинг қизиқарли бўлиши учун режалар тузинг.
Изоҳ (0)