Наманган вилояти Мингбулоқ туманида жаҳлини боса олмаган шахс пичоқ билан аёлни жароҳатлади, деб хабар бермоқда Ички ишлар вазирлиги.

Маълум қилинишича, 17 сентябрь куни соат 20:50 атрофида фуқаро (1995 йилда туғилган) Мингбулоқ тумани ҳудудида жойлашган ошхонага борган. Шу ерда ишлайдиган таниш аёлга (1994 йилда туғилган) «Нега мен билан бирга яшамайсан?», деб ёнидаги ошхона пичоғи билан кўкрак орқа девори ва чап қулоқ орқа қисмига уриб, тан жароҳати етказган.

Эркак 9 август куни Жиноят кодексининг 277-моддаси 3-қисми (совуқ қурол ёки кишининг соғлиғи учун амалда шикаст етказиши мумкин бўлган нарсаларни (қурол сифатида) намойиш қилиб, уларни қўллаш билан қўрқитиб безорилик қилиш) билан судланган.

Юқоридаги ҳолат юзасидан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган. Ушбу жиноятни содир этган шахс уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.