Rossiya prezidenti Vladimir Putin politsiya xodimlarining vakolatlarini kengaytiruvchi qonunni imzoladi. Hujjat huquqiy axborot portalida e’lon qilindi, deb yozadi “RBK”.
Asosiy yangiliklardan biri — politsiya xodimlariga transport vositasini ochish va unga kirish huquqi berildi. Endilikda politsiya tartibsizliklar va favqulodda vaziyatlarda fuqarolarning hayotini saqlab qolish yoki ularning xavfsizligini ta’minlash; jinoyatni bostirish yoki terrorchilik harakati xavfi haqidagi xabarni tekshirish; baxtsiz hodisaning holatlarini aniqlash uchun avtomashinalarni ochishi mumkin.
Bundan tashqari, ichki ishlar xodimlariga jinoyat sodir etishda gumon qilinuvchi yoki ayblanuvchilarni, voqea joyida ushlanganlarni, shuningdek, jabrlanuvchilar yoki guvohlar tomonidan jinoyat sodir etgani aytilgan shaxslarni ushlab turish uchun avtomashinalarni ochishga ruxsat beriladi. Yana bir holatda — agar avtomashinada ma’muriy huquqbuzarlik sodir etgan mast kishi borligini “tasdiqlovchi asoslar mavjud bo‘lsa”, mashinani tintish mumkin.
Qonunga ko‘ra, avtomobilni ochishdan oldin politsiya xodimi o‘zini tanishtiradi, hujjatlarini taqdim etadi, o‘z harakatlarining sababi va asoslarini, shuningdek, fuqarolarning huquq va majburiyatlarini tushuntiradi (“vaqt o‘tkazish hayot va sog‘liq uchun xavf tug‘diradigan” hollar bundan mustasno). Agar o‘sha paytda mashina egasi uning yonida bo‘lmasa, politsiya uni voqea haqida 24 soat ichida xabardor qilishi kerak.
Shuningdek, qonun ichki ishlar xodimlarining turar joy va boshqa binolarga, yer va hududlarga hibsga olish uchun kirishdagi vakolatlarini kengaytiradi. Hujjatning avvalgi tahririda politsiya jinoyatda gumonlanuvchilarni qo‘lga olish uchun uylarga kirishi mumkin edi. Yangi tahrirda esa politsiya jinoyatda gumon qilinganlarni faqat jabrlanuvchilar va guvohlarning so‘zlari bilan ham hibsga olishi mumkinligi aytilgan.
Rossiya hukumati politsiya vakolatlarini kengaytirish to‘g‘risidagi qonun loyihasini 2020-yil may oyida Davlat Dumasiga taqdim etgandi, shu yilning 8 -dekabrida quyi palata uni uchinchi — yakuniy o‘qishda qabul qildi.
Bundan tashqari, Putin Rossiya subyektlarida davlat hokimiyatini tashkil etish to‘g‘risidagi qonunni ham tasdiqladi, deb yozadi “RBK”. Yangi qonunga ko‘ra, Rossiya tarkibiga kiruvchi hududlar rahbarlar endi prezident deb atalmaydi.
“Rossiya Federatsiyasi subyektining eng yuqori mansabdor shaxsi lavozimi Rossiya Federatsiyasi subyektining nomini ko‘rsatgan holda “rahbari” deb ataladi. Bunday nomda davlat rahbari — Rossiya Federatsiyasi prezidenti lavozimining nomini tashkil etuvchi so‘zlar va iboralar ishlatilishi mumkin emas”, — deyiladi yangi qonunning 20-moddasi 4- va 6-bandlarida.
Hujjat hali ko‘rib chiqilayotgan paytda Tataristonda norozilikka sabab bo‘lgandi, chunki mintaqa rahbari lavozimi “Tatariston Respublikasi prezidenti” deb ataladi. Tatariston parlamenti qonun loyihasiga qarshi chiqqan, ular hujjat qoidalarini Rossiya konstitutsiyaviy tuzumining asoslariga zid deb atagandi.
Tatariston Rossiya tarkibidagi uning rahbari prezident deb ataluvchi yagona hudud bo‘lib qolmoqda.
“Davlat hokimiyatini tashkil etish to‘g‘risida”gi qonunda, shuningdek, hudud rahbarlariga ketma-ket ikki martadan ortiq saylanish huquqi berilgan, prezidentning hudud rahbarlarini ishonchni yo‘qotgan taqdirda lavozimidan chetlashtirish huquqi esa mustahkamlangan.
Qonun hududlarga subyekt rahbari saylanishi mumkin bo‘lgan muddatlarning maksimal sonini mustaqil ravishda belgilash huquqini beradi. Avval vakolat muddati bir xil — besh yil etib belgilangandi. Shu bilan birga, qonunda 30 yoshdan oshgan, yashash uchun ruxsatnomasi yoki boshqa davlat fuqaroligiga ega bo‘lmagan shaxs hudud rahbari bo‘lishi mumkinligi belgilab qo‘yilgan.
Hudud rahbari bir vaqtning o‘zida boshqa haq to‘lanadigan ishda ishlay olmaydi. Unga xorijiy notijorat tashkilotlari rahbariyatida ishlashga ruxsat berilmaydi.
Hudud rahbari har qanday asoslar bo‘yicha ishonchni yo‘qotgani munosabati bilan yoki hududning qonun chiqaruvchi kengashi tomonidan ishonchsizlik bildirilganidan keyin prezident tomonidan lavozimidan chetlatilishi mumkin. Ilgari prezident korrupsiya yoki manfaatlar to‘qnashuvi faktlari tufayli ishonch yo‘qolgan hudud rahbarlarini lavozimidan chetlashtirishi mumkin edi.
Izoh (0)