Россиялик миллиардер, «Челси» футбол клуби эгаси Роман Абрамович Португалия фуқаросига айланди. Бу ҳақда Португалиянинг Público газетасига таяниб, Meduza хабар берди.
Público маълумотларига кўра, фуқаролик тўғрисидаги қонунга биноан Абрамович Пиреней ярим оролида яшовчи сефард яҳудийлари жамоасининг (ярим оролда ташкил топган яҳудийларнинг субетник гуруҳи) авлоди сифатида Португалия фуқаролигига қабул қилинган.
Тадбиркор фуқароликни олиш учун 2020 йил октябрь ойида ариза топширган, процедура 2021 йил апрелида якунланган. Абрамовичнинг келиб чиқиши у билан ҳамкорлик қилган Португалия яҳудий жамоасининг сефардик комиссияси томонидан тасдиқланган.
Público газетасининг қайд этишича, Абрамович Португалия паспортини олганидан кейин ушбу мамлакатнинг энг бой фуқаросига айланди.
Португалия нашрининг маълумотларини Абрамовичга яқин бўлган Forbes ва «РБК» манбалари тасдиқлади. Абрамовичнинг активларини бошқарадиган Millhouse компанияси ҳам ушбу маълумотни «РБК»га тасдиқлади.
2018 йилнинг май ойида Роман Абрамович Исроил фуқаролигини олганди. Буюк Британия унинг инвестицион виза олиш учун топширган ҳужжатларини кўриб чиқиш жараёнини кечиктиргач шундай бўлганди.
Роман Абрамович 2021 йил апрель ойида Forbes талқинига кўра, Россиянинг энг бой тадбиркорлари рейтингида 12-ўринни эгаллаган. Ўшанда журнал унинг бойлигини 14,5 миллиард долларга баҳолаган. Forbes реал вақт режимида тузадиган Real Time Billionaires сайёранинг энг бой одамлари рейтингида Абрамович 14,3 миллиард доллар бойлиги билан 145-ўринни эгаллаб турибди. Bloomberg ўз рейтингида унинг бойлигини 17,6 миллиард долларга баҳолаган.
Изоҳ (0)