Шавкат Мирзиёев Қозоғистон мустақиллигининг 30 йиллиги муносабати билан мамлакат биринчи президенти Нурсултон Назарбоев ва президент Қосим-Жўмарт Тўқаевга қутловлар йўллаб, уларга ва Қозоғистон халқига ўз тилакларини билдирди. Бу ҳақда президент матбуот котиби Шерзод Асадов хабар қилди.
Маълум қилинишича, мактубларда ўтган давр мобайнида мамлакатда барқарор ўсишни таъминлашга қаратилган тизимли ва кенг қамровли ислоҳотлар натижа бергани, бугунги кунда мамлакат барча соҳаларда юксак тараққиётга эришаётгани қайд этилган.
«Асрлар давомида халқларимиз ўртасида давом этиб келаётган ўзаро аҳиллик, дўстлик ва яхши қўшничилик муносабатлари сўнгги йилларда янада мустаҳкамланиб бораётгани бизни, айниқса, қувонтиради», — дея таъкидлаган давлат раҳбари.
Таъкидланишича, 2022 йил мамлакатимизда Қозоғистон йили деб эълон қилинади. «Бу, ҳеч шубҳасиз, яқин дўстлик, яхши қўшничилик ва стратегик шериклик руҳидаги алоқаларимизни сифат жиҳатидан мутлақо янги босқичга олиб чиқишига олиб келади», — дейилади хабарда.
Мактублар якунида элбоши Нурсултон Назарбоев ва президент Қосим-Жўмарт Тўқаевга сиҳат-саломатлик, туганмас куч-қувват ва янги зафарлар, биродар Қозоғистон халқига эса тинчлик-омонлик, фаровонлик, бахт-у саодат ва доимий тараққиёт тилаклари изҳор этилган.
Эслатиб ўтамиз, Шавкат Мирзиёев 5—6 декабрь кунлари давлат ташрифи билан Қозоғистонда бўлди. Ташриф давомида Оқўрдада Шавкат Мирзиёев ва Қосим-Жўмарт Тўқаев тор доирада музокаралар ўтказди, икки томонлама ҳамкорликнинг муҳим вазифаларини белгилаб олди, икки давлат ўртасида иттифоқчилик муносабатлари тўғрисидаги декларация имзолади.
Изоҳ (0)