Shavkat Mirziyoyev Qozog‘iston mustaqilligining 30 yilligi munosabati bilan mamlakat birinchi prezidenti Nursulton Nazarboyev va prezident Qosim-Jo‘mart To‘qayevga qutlovlar yo‘llab, ularga va Qozog‘iston xalqiga o‘z tilaklarini bildirdi. Bu haqda prezident matbuot kotibi Sherzod Asadov xabar qildi.
Ma’lum qilinishicha, maktublarda o‘tgan davr mobaynida mamlakatda barqaror o‘sishni ta’minlashga qaratilgan tizimli va keng qamrovli islohotlar natija bergani, bugungi kunda mamlakat barcha sohalarda yuksak taraqqiyotga erishayotgani qayd etilgan.
“Asrlar davomida xalqlarimiz o‘rtasida davom etib kelayotgan o‘zaro ahillik, do‘stlik va yaxshi qo‘shnichilik munosabatlari so‘nggi yillarda yanada mustahkamlanib borayotgani bizni, ayniqsa, quvontiradi”, — deya ta’kidlagan davlat rahbari.
Ta’kidlanishicha, 2022-yil mamlakatimizda Qozog‘iston yili deb e’lon qilinadi. “Bu, hech shubhasiz, yaqin do‘stlik, yaxshi qo‘shnichilik va strategik sheriklik ruhidagi aloqalarimizni sifat jihatidan mutlaqo yangi bosqichga olib chiqishiga olib keladi”, — deyiladi xabarda.
Maktublar yakunida elboshi Nursulton Nazarboyev va prezident Qosim-Jo‘mart To‘qayevga sihat-salomatlik, tuganmas kuch-quvvat va yangi zafarlar, birodar Qozog‘iston xalqiga esa tinchlik-omonlik, farovonlik, baxt-u saodat va doimiy taraqqiyot tilaklari izhor etilgan.
Eslatib o‘tamiz, Shavkat Mirziyoyev 5—6-dekabr kunlari davlat tashrifi bilan Qozog‘istonda bo‘ldi. Tashrif davomida Oqo‘rdada Shavkat Mirziyoyev va Qosim-Jo‘mart To‘qayev tor doirada muzokaralar o‘tkazdi, ikki tomonlama hamkorlikning muhim vazifalarini belgilab oldi, ikki davlat o‘rtasida ittifoqchilik munosabatlari to‘g‘risidagi deklaratsiya imzoladi.
Izoh (0)