6-dekabr kuni Qozog‘istonning Oqo‘rda qarorgohida O‘zbekiston prezidenti Shavkat Mirziyoyevni rasmiy kutib olish marosimi bo‘ldi. Bu haqda davlat rahbarining matbuot xizmati xabar berdi.
Oliy martabali mehmon sharafiga faxriy qorovul saf tortgan. O‘zbekiston va Qozog‘iston davlat madhiyalari yangragan.
Prezidentlar Shavkat Mirziyoyev va Qosim-Jo‘mart To‘qayev faxriy qorovul oldidan o‘tib, rasmiy delegatsiyalar a’zolarini bir-biriga tanishtirgan, so‘ng davlat rahbarlarining tor doiradagi muzokaralari bo‘lib o‘tgan.
Samimiyat va ishonch ruhida o‘tgan uchrashuvda yetakchilar ko‘p qirrali O‘zbekiston—Qozog‘iston sherikligiga doir keng ko‘lamli masalalarni, shu jumladan, siyosiy, savdo-iqtisodiy, madaniy-gumanitar sohalardagi hamkorlikni ko‘rib chiqqan, xalqaro va mintaqa kun tartibi yuzasidan fikr almashgan.
Qozog‘iston prezidenti Shavkat Mirziyoyevni tashrifi bilan qutlab, prezident saylovida ishonchli g‘alaba qozongani bilan yana bir bor tabriklagan va kelgusi faoliyatiga muvaffaqiyatlar tilab, ushbu uchrashuvning muhim ahamiyatini alohida qayd etgan.
“Siz Qozog‘istonga davlat tashrifi bilan kelganingizdan juda mamnunmiz. Hamkorlikni yangi darajaga olib chiqishda ushbu voqea juda muhim. Bugun imzolanadigan hujjatlar to‘plami sherikligimizga qo‘shimcha sur’at bag‘ishlaydi. Mamlakatlarimiz hukumatlariga barcha sa’y-harakatlarni qo‘yilgan maqsadlarga erishishga qaratish topshirig‘ini berishga kelishib oldik. O‘ylaymizki, mamlakatlarimiz o‘rtasidagi munosabatlar butun Markaziy Osiyo mintaqasida barqarorlik va xavfsizlikni ta’minlashning jiddiy omili bo‘lib xizmat qiladi”, — deydi Qozog‘iston prezidenti.
Shavkat Mirziyoyev taklif uchun minnatdorlik bildirib, ushbu uchrashuv Qozog‘iston mustaqilligining 30 yilligi arafasida o‘tayotganini ta’kidlagan hamda O‘zbekiston xalqi nomidan birodar qozoq xalqini ushbu qutlug‘ sana bilan samimiy tabriklagan, tinchlik-osoyishtalik, ravnaq va yangi zafarlar tilagan.
Bugungi kunda Qosim-Jo‘mart To‘qayev rahbarligida Qozog‘iston birinchi prezident – elboshi Nursulton Nazarboyev boshlagan katta bunyodkorlik ishlarini davom ettirayotgani va barqaror taraqqiyot yo‘lidan dadil borayotgani ta’kidlangan.
O‘zbekiston yetakchisi ikki birodar davlat o‘rtasidagi do‘stlik va yaxshi qo‘shnichilik munosabatlarining rivojlanish sur’atini mamnuniyat bilan qayd etgan.
“Keyingi yillarda hamkorligimizni mutlaqo yangidan tashkil etdik va bugun qo‘shma sa’y-harakatlarimiz o‘zining ilk salmoqli natijalarini berayotganining guvohi bo‘lib turibmiz. O‘zbekiston va Qozog‘iston – tabiiy iqtisodiy hamkorlar. Iqtisodiyotlarimiz raqobat qilmaydi, bir-birini to‘ldirib turadi. O‘zaro savdo ortmoqda. Joriy yilda tovar ayirboshlash rekord daraja — 4 milliard dollarga yetishi kutilmoqda. Avtomobilda va temiryo‘llari orqali yuk tashish hajmlari oshmoqda. Aviaqatnovlar to‘liq qayta tiklandi, yangi yo‘nalishlar ochilmoqda.
Yetakchi korxonalarimiz kooperatsiyani muvaffaqiyatli kengaytirmoqda. Keyingi yillarda iqtisodiyotning deyarli barcha tarmoqlarida qo‘shma korxona va loyihalar soni 6 barobarga oshdi”, – deydi Shavkat Mirziyoyev.
Savdo-iqtisodiy hamkorlik rivojlanib borayotgani, bunda ikki mamlakat hududlari va tadbirkorlari o‘rtasidagi to‘g‘ridan to‘g‘ri aloqalar muhim o‘rin tutayotgani alohida ta’kidlangan.
Ma’lumot uchun, O‘zbekiston prezidentining tashrifi arafasida Turkiston shahrida bosh vazirlar raisligida Hukumatlararo komissiya yig‘ilishi va Hududlar forumi o‘tdi. Kuni kecha Qozog‘iston poytaxtida qo‘shma biznes-forum muvaffaqiyatli o‘tkazildi. Ushu tadbirlar natijasida jami 6 milliard dollarlik kelishuv va shartnomalar imzolangan.
Keyingi yillarda qo‘shma korxonalar soni 6 barobarga oshgan. Kostanayda avtomobil, avtobus va qishloq xo‘jaligi texnikasini ishlab chiqarish yo‘lga qo‘yilgan. Turkiston va Chimkentda zamonaviy to‘qimachilik va maishiy texnik korxonalari ishga tushirilgan. O‘zbekistonda qozog‘istonlik hamkorlar bilan birgalikda energetika, sanoat, kimyo, oziq-ovqat tarmoqlari, qurilish sohasida qator loyihalar amalga oshirilmoqda.
“Bugun ikki tomonlama strategik sherikligimizni ittifoqchilik munosabatlari darajasiga ko‘tarish to‘g‘risida tarixiy qaror qabul qilamiz. Bu nafaqat mamlakatlarimiz, balki butun mintaqaning izchil taraqqiyoti, barqarorligi va ravnaqi uchun ulkan ahamiyatga ega bo‘ladi”, – deydi O‘zbekiston prezidenti.
Yetakchilar mintaqa va xalqaro kun tartibining tomonlarni qiziqtirgan dolzarb masalalari yuzasidan ham fikr almashgan.
Uchrashuvda davlat rahbarlari O‘zbekiston va Qozog‘iston o‘rtasidagi do‘stlik va yaxshi qo‘shnichilik munosabatlarini yanada mustahkamlash borasidagi intilishi qat’iy ekanini yana bir bor tasdiqlagan.
Eslatib o‘tamiz, Shavkat Mirziyoyev Qozog‘iston prezidenti Qosim-Jo‘mart To‘qayevning taklifiga binoan 5-dekabrdan buyon davlat tashrifi bilan Nur-Sultonda bo‘lib turibdi. O‘zbekiston prezidenti 6-dekabr kuni Qozog‘istonning Nur-Sulton shahridagi “Otan korg‘aushilar” (“Vatan himoyachilari”) monumentiga gul qo‘ygan.
Izoh (0)