Урганч шаҳрининг транспорт тизимини ривожлантириш моделини ишлаб чиқиш ва Урганч шаҳрида BRT (bus rapid transit — бошқа транспортлардан тўлиқ озод қилинган тезкор автобус йўналиши) тизимини яратиш учун 1,221 миллиард сўм ажратилади. Хоразм вилояти ҳокими бу борадаги тегишли фармойишни имзолаган.
Мазкур маблағ вилоят маҳаллий бюджетининг 2021 йил 3-чорак даромадлар режасини ошириб бажарилган қисми ҳисобидан Урганч шаҳар маҳаллий бюджетига ажратилади.
Фармойиш билан Хоразм молия бош бошқармасига вилоят маҳаллий бюджетига тегишли ўзгартиришлар киритиш, вилоят ғазначилик бошқармасига ажратилган маблағларни белгиланган тартибда ўтказилишини таъминлаш, вилоят давлат молиявий-назорат бошқармасига эса ажратилган маблағларни мақсадли ишлатилишини назорат қилиш вазифаси юкланган.
Ушбу фармойишнинг ижросини назорат қилиш вазифаси вилоят ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — вилоят иқтисодий тараққиёт ва камбағалликни қисқартириш бош бошқармаси бошлиғи К.Игамбергенов зиммасида.
Аввалроқ Тошкентдан «Ташморе»гача алоҳида йўлакда ҳаракатланувчи тезюрар автобуслар йўлга қўйилиши, Тошкентда автобуслар учун алоҳида ҳаракатланиш бўлаги ажратилиб, бекатлар янгиланиши тўғрисида хабар берилганди.
Изоҳ (0)