Ўзбекистон йўлларида содир бўлган ҳодисалар тафсилотларини тақдим этамиз.
Наманганда Spark зовурга тушиб кетди.
2021 йилнинг 13 декабрь куни соат 16:20 ларда, Наманган вилояти, Норин тумани ҳудудидан ўтувчи Чўжа–Хақулобод автомобиль йўлининг 23-километрида ҳайдовчи Д.Р. (1978 йилда туғилган) Spark автомобилида ҳаракатланаётиб, рул бошқарувини йўқотиши оқибатида зовурга тушиб кетган.
Ҳодиса натижасида ҳайдовчи Д.Р. тан жароҳати билан шифохонага ётқизилган.
Мазкур ЙТҲ юзасидан Норин тумани ИИБ ЙҲХБ ходимлари томонидан суриштирув ҳаракатлари олиб борилмоқда.
Қашқадарёда «Жигули» автобус билан тўқнашди.
2021 йилнинг 11 декабрь куни соат 17:10 ларда, Қашқадарё вилояти, Нишон тумани ҳудудидан ўтувчи 4Р-89 автомобиль йўлининг 31-километрида ҳайдовчи Т.Б. (1988 йилда туғилган) «ВАЗ-2103» автомобилини юқори тезликда бошқараётиб, рул бошқарувини йўқотган ва қарама-қарши йўналишдан ҳаракатланиб келаётган, ҳайдовчи У.Б. (1996 йилда туғилган) бошқарувидаги Isuzu автобуси билан тўқнашган.
Оқибатда «ВАЗ-2103» автомобили ҳайдовчиси Т.Б. оғир тан жароҳатлари олиб воқеа жойида вафот этган ҳамда ушбу автомобиль йўловчиси Э.А. (2013 йилда туғилган) ва автобус йўловчиси М.Р. (1973 йилда туғилган) тан жароҳати олиб шифохонага ётқизилган.
Мазкур ЙТҲ юзасидан Нишон тумани ИИБ ҳузуридаги ТБ томонидан дастлабки тергов ҳаракатлари олиб борилмоқда.
Тошкентда Matiz ва Lacetti тўқнашуви оқибатида 1 киши вафот этди, 4 киши жароҳатланди.
2021 йилнинг 11 декабрь куни соат 17:50 ларда, Тошкент шаҳар, Мирзо Улуғбек тумани, Темур Малик–Дўрмон йўли кўчалари кесишган чорраҳада ҳайдовчи С.Р. (1996 йилда туғилган) Matiz автомобилини бошқараётиб, қарама–қарши йўналишдан ҳаракатланиб келаётган ҳайдовчи А.Т. (1994 йилда туғилган) бошқарувидаги Lacetti автомобилини ўтказиб юбормагани оқибатида ЙТҲ содир бўлган.
Оқибатда Matiz автомобили йўловчиси З.М. (1956 йилда туғилган) олган оғир тан жароҳатлари туфайли воқеа жойида вафот этган. Шунингдек Matiz ҳамда Lacetti ҳайдовчилари ва Matiz автомобили йўловчилари У.З. (1981 йилда туғилган) ва З.О. (2015 йилда туғилган) тан жароҳатлари олиб шифохонага ётқизилган.
Мазкур ЙТҲ юзасидан Тошкент шаҳар ИИББ ҳузуридаги ТБ томонидан дастлабки тергов ҳаракатлари олиб борилмоқда.
Зангиотада 2 та Matiz ва битта Spark иштирокида ЙТҲ содир бўлди.
Тошкент вилояти Зангиота тумани ички йўлларида 2 та Matiz ва битта Spark автомобили иштирокида йўл-транспорт ҳодисаси содир бўлган.
Matiz ва Spark ўз йўналишида келаётган вақтда қарама-қарши томонда ҳаракатланган Matiz 2 автомобиль йўлига чиқиб кетади ва улар билан тўқнашади.
Дастлабки суриштирувларга кўра, қарама-қарши йўналишга чиқиб кетган ҳайдовчи қаттиқ маст экани аниқланган.
Ургутда Nexia-3 пиёдани уриб кетди.
2021 йил 28 ноябрь куни соат 06:30 ларда Ургут тумани «Аъло хотин» МФЙ ҳудудидан ўтувчи 4Р-50 автомобиль йўлининг 21-километрида Nexia-3 автомобили юқори тезликда олдинда йўлини кесиб ўтаётган пиёдани уриб кетган.
Оқибатда пиёда вафот этган.
Сирдарёда Gentra’нинг 2 йўловчиси жароҳатланди.
2021 йил 11 декабрь куни тахминан соат 15:30 ларда Сирдарё вилояти Мирзаобод тумани ҳудудидан ўтувчи М-34 халқаро аҳамиятга эга йўлнинг 128-километрида Gentra автомобили ҳайдовчиси бошқарувни йўқотиб, ЙТҲ содир этган.
Оқибатда машина ичидаги икки йўловчи тан жароҳати олиб шифохонага ётқизилган.
Ҳолат юзасидан тергов жараёнлари олиб борилмоқда.
Оқолтин туманида Lada Largus Isuzu’га бориб урилди.
2021 йилнинг 10 декабрь куни соат 10:20 да Сирдарё вилояти Оқолтин туманида ўтувчи М-39 автомобиль йўлининг 931-километрида Тошкент–Термиз йўналишида ҳаракатланиб кетаётган Lada Largus худди шу йўналишда ҳаракатланиб кетаётган Isuzu юк машинасининг орқасига урилган.
Оқибатда Lada Largus ҳайдовчиси ва йўловчиси шифохонага ётқизилган.
Изоҳ (0)