Urganch shahrining transport tizimini rivojlantirish modelini ishlab chiqish va Urganch shahrida BRT (bus rapid transit — boshqa transportlardan to‘liq ozod qilingan tezkor avtobus yo‘nalishi) tizimini yaratish uchun 1,221 milliard so‘m ajratiladi. Xorazm viloyati hokimi bu boradagi tegishli farmoyishni imzolagan.
Mazkur mablag‘ viloyat mahalliy budjetining 2021-yil 3-chorak daromadlar rejasini oshirib bajarilgan qismi hisobidan Urganch shahar mahalliy budjetiga ajratiladi.
Farmoyish bilan Xorazm moliya bosh boshqarmasiga viloyat mahalliy budjetiga tegishli o‘zgartirishlar kiritish, viloyat g‘aznachilik boshqarmasiga ajratilgan mablag‘larni belgilangan tartibda o‘tkazilishini ta’minlash, viloyat davlat moliyaviy-nazorat boshqarmasiga esa ajratilgan mablag‘larni maqsadli ishlatilishini nazorat qilish vazifasi yuklangan.
Ushbu farmoyishning ijrosini nazorat qilish vazifasi viloyat hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i K.Igambergenov zimmasida.
Avvalroq Toshkentdan “Tashmore”gacha alohida yo‘lakda harakatlanuvchi tezyurar avtobuslar yo‘lga qo‘yilishi, Toshkentda avtobuslar uchun alohida harakatlanish bo‘lagi ajratilib, bekatlar yangilanishi to‘g‘risida xabar berilgandi.
Izoh (0)