Ижтимоий тармоқларда Chevrolet автомобилларини олиб кетаётган автотрейлернинг ёнаётгани акс этган видео тарқалди. UzAuto Motors компанияси ҳолатга муносабат билдириб, ёнғин Москва вилояти ҳудудида содир бўлганини маълум қилди.
Дастлабки маълумотларга кўра, ёнғин Россия автомобиль ташувчисига тегишли автотрейлернинг салонида содир бўлган, шундан сўнг аланга автомобиллар бўлган трейлерга ўтган. Ёнғин оқибатида 8 та автомобилдан 3 таси зарар кўрган. Ҳодиса натижасида автотрейлер ҳайдовчиси жабрланмаган.
«Воқеа Москва вилояти ҳудудида автомобилларни мижозга олиб ўтиш вақтида содир бўлган. Барча ташилган автомобиллар суғурталанган бўлиб, улар россиялик мижозга тегишли бўлган. Ҳодиса оқибатида ҳеч ким жабрланмаган. Ҳозирда зарурий ёнғин-техник экспертизаси ўтказилиб, ёнғиннинг келиб чиқиш сабаблари ўрганилмоқда», — дейилади муносабатда.
Эслатиб ўтамиз, 2020 йилнинг октябрида UzAuto Motors компанияси томонидан ишлаб чиқарилган янги енгил автомобилларни олиб кетаётган автовоз аварияга учраган эди.
Мавзуга доир: Ўзбекистонда иккиламчи бозорда автомобиллар нархи кўтарилди. Бунинг асосий сабаби нима?
Изоҳ (0)