Президент Шавкат Мирзиёев бошчилигида ўтказилаётган видеоселектор йиғилишида эндокрин касалликларини барвақт аниқлаш бўйича қабул қилинадиган дастурда ташхислар ва даволаш мақсадида, туман ва шаҳар марказий шифохоналарида беморларнинг бир суткалик стационар кузатиш тизими жорий этилиши айтилди. Бу ҳақда «Дарё» мухбири хабар қилди.
Ҳар бир ҳудуддаги «саломатлик мактаблари»да, маҳаллалардаги беморларга, шунингдек, диабетга мойиллиги бор, ортиқча вазнли аҳолига касалликни бошқариш ўргатилади. Мисол учун, Фарғона вилояти Эндокринология маркази филиалида «болалар диабет мактаби» ташкил этилиб, 1-6 ёшгача диабети бор болаларнинг ота-онасига, 7 ёшдан 18 ёшгача бўлган болалар ва ўсмирларга диабет билан яшашни ўргатиш, яъни ўз касаллигини бошқариш, инсулин қабул қилиш, тўғри овқатланиш, спорт билан шуғулланишга ўргатиш йўлга қўйилган.
Бугунги кунда касалликни тўғри бошқариш ҳисобига 6 нафар болалар спорт турлари бўйича юқори натижаларга эришиб келаётгани қайд этилди.
Президент, шунингдек, анъанавий ва онлайн усулда тиббиёт ходимларининг малакасини ошириш ва қайта тайёрлашни йўлга қўйиш бўйича топшириқ берди. Бунда, Жаҳон соғлиқни сақлаш ташкилоти билан ҳамкорликда патронаж ҳамширалар ҳамда оилавий шифокорлар, амалиётдаги эндокринолог шифокорлар малакасини ошириш учун, ўқув курслари ташкил этилади.
ССВ вазирлиги ва саломатлик маркази бир ой муддатда Ибн Сино техникумларини «саломатлик мактаблари»нинг таянч базасига айлантириб, муаллимлар ва битирувчи курс ўқувчиларини ушбу «мактаблар»га бириктириш вазифаси белгиланди. Келгуси йилдан эндокринология ва кардиология йўналишларида патронаж ҳамширалари тайёрлашни йўлга қўйишни ҳам назарда тутиш зарурлиги билдирилди.
Изоҳ (0)