Эндокрин касалликларининг оғир оқибатлари, асосан, Тошкент шаҳри, Қорақалпоғистон, Андижон, Наманган ва Тошкент вилоятларига тўғри келмоқда. Бу ҳақда президент Шавкат Мирзиёев бошчилигида ўтказилаётган видеоселектор йиғилишида айтиб ўтилди, дея хабар бермоқда «Дарё» мухбири.
Президент республикада эндокрин касалликларини барвақт аниқлаш ва даволашга 25 йил давомида эътибор сусайиб кетгани, касалликларнинг олдини олиш борасида бирламчи бўғинда ҳали қилинадиган ишлар кўплигини қайд этди.
Сўнгги беш йилда эндокрин касалликлари 20 фоизга ортиб, айниқса, ёшлар орасида кўпаяётгани билдирилди.
Шунингдек, давлат раҳбари аксарият ҳудудлар аҳолиси, айниқса, болалар орасида ёд етишмаслиги, оқибатда буқоқ касаллиги Қорақалпоғистон, Сурхондарё, Бухоро, Қашқадарё ва Тошкент вилоятида юқорилигича қолаётганини таъкидлади.
Айни соҳада бир ой муддатда ҳар бир хавотирли туман ва шаҳар бўйича бир йиллик алоҳида дастур ишлаб чиқилиши айтилди.
Эндокринология маркази учун «эски ТошМИ» ҳудудида энг замонавий ускуналар билан жиҳозланадиган, 600 ўринли янги бино қурилаётгани маълум қилинди ва масъулларга уни келгуси йил 1 майга қадар ишга тушириш бўйича топшириқ берилди.
Изоҳ (0)