Ўзбекистон президенти Шавкат Мирзиёев қозоғистонлик ҳамкасби Қосим-Жўмарт Тўқаев таклифига биноан 5—6 декабрь кунлари давлат ташрифи билан Нур-Султонда бўлди. Ташриф давомида Ўзбекистон ва Қозоғистон ўртасида иттифоқчилик муносабатлари тўғрисидаги декларация имзоланди. Ўзбекистон ташқи ишлар вазири Абдулазиз Комилов ва Ўзбекистон Сенати раисининг биринчи ўринбосари Содиқ Сафоев «Ўзбекистон 24» телеканалига берган интервьюларида мазкур декларация аҳамияти ҳақида фикр билдирди.
«Бизга шундай ҳужжат керак эди»
Абдулазиз Комиловнинг таъкидлашича, президент Шавкат Мирзиёевнинг Қозоғистонга ушбу ташрифи «жуда самарали ва сермаҳсул бўлган».«Музокаралар натижасида 20 дан ортиқ давлатлараро, ҳукуматлараро, идоралараро ҳужжатлар имзоланди. Сиёсий нуқтаи назардан энг муҳими — иттифоқчилик алоқалар тўғрисидаги декларациядир. Ушбу жуда муҳим ҳужжатда келажакдаги стратегик ҳамкорлигимизнинг асосий йўналишлари белгиланган. Бу ҳужжат сиёсий ҳамкорлик, иқтисодиёт, инвестициялар, маданий-гуманитар соҳалардаги ҳамкорлигимизга алоқадор, бундан ташқари, ушбу ҳужжат ҳамкорлигимизнинг жуда муҳим қисми — хавфсизлик соҳасидаги ҳамкорликни ҳам давом эттиради. Бундай саммитлар йилдан йилга доимий равишда ўтказилиши натижасида жуда катта натижаларга эга бўляпмиз», — деди Комилов.
Ташқи ишлар вазирининг изоҳлашича, қабул қилинган декларация «ўзидан-ўзи пайдо бўлмаган».
«Нега деганда, ҳозирги вазиятда янги-янги масалалар, янги муаммолар юзага чиқяпти. Буларни биргаликда ҳал қилиш учун бизга шундай ҳужжат керак эди. Бу ҳужжатни устида экспертларимиз жуда жиддий ишлади. Декларацияда кўрсатилган йўналишлар бўйича ҳамкорликни амалга ошириш учун учта кенгаш тузилади. Биринчиси — давлатлараро кенгаш, президентлар даражасида; иккинчиси — парламентлараро кенгаш; учинчиси — ташқи ишлар вазирлари кенгаши. Ташқи ишлар вазирликларига юқоридаги икки кенгаш фаолиятини мувофиқлаштириш вазифаси ҳам юклатилган», — деди у.
Абдулазиз Комилов Марказий Осиё давлатлари орасида бундай декларация илк бор имзоланганини ҳам алоҳида қайд этиб ўтди.
«Нима учун Қозоғистон билан Ўзбекистон? Негаки, Қозоғистон ва Ўзбекистон ўзига яраша жуда катта салоҳиятга эга. Бир-бирига жуда яқин. Иккинчидан, халқаро майдонда ҳам бу давлатларнинг роли жуда жиддий. Иккала давлатнинг салоҳиятини, албатта, биз ишлатамиз ва бошқа давлатлар билан ҳамкорликни давом эттирамиз. Биз бу алоқаларни нафақат ўзимиз учун ривожлантирамиз, балки бири-бирига қўшни беш давлатнинг умумий манфаатларини амалга оширишда кенг доирада ҳамкорликни давом эттирамиз. Албатта, кун тартибида хавфсизлик масалалари ҳам мавжуд бўлди», — дея қўшимча қилади Ўзбекистон ташқи ишлар вазири.
Унинг сўзларига кўра, «Афғонистондаги вазият — долзарб муаммо».
«Афғонистондаги вазиятга нисбатан мана шу иккита давлатнинг муносабат бир-бирига жуда яқин. Бундан ташқари, икки давлат кўп йиллар мобайнида шу йўналишдаги ҳамкорликни давом эттириб келяпти. Президентимиз шуни яна бир бор таъкидлаб айтдиларки, Афғонистондаги вазиятни сиёсий ҳал қилиш, бошқа масалалар муҳим, лекин ушбу мамлакатдаги ҳозирги гуманитар аҳвол — энг долзарб масала ва биз нафақат ўзимиз, балки халқаро майдондаги бошқа ташкилотлар, бошқа давлатларнинг ҳам эътиборини мана шу масалага жалб этишимиз керак», — дея қўшимча қилди Абдулазиз Комилов.
«Ўзбекистон ва Қозоғистон Сенатининг навбатдаги учрашуви Орол денгизига яқин минтақада бўлади»
Сенат раисининг биринчи ўринбосари Содиқ Сафоевнинг таъкидлашича, Ўзбекистон президентининг ушбу лавозимга қайта сайланганидан кейинги дастлабки давлат ташрифини Қозоғистонга амалга оширганида ўзига хос рамзий маъно бор.«Чунки Қозоғистон биз учун ҳар томонлама энг муҳим давлатлардан бири. Мана шу иттифоқчилик муносабатлари ҳақидаги ҳужжатда алоҳида икки мамлакат парламентлараро кенгашини таъсис этиш ҳақидаги қарорга эришилди. Биласизми, парламентлараро муносабатлар давлатлар ва халқлар ўртасидаги ишончнинг чуқурлигини ва улар мустаҳкамлигини кўрсатади. Ўйлайманки, бежиз эмаски, охирги йилларда Ўзбекистон ва Қозоғистон парламентлари ўртасида, парламент палаталари ўртасида мулоқот доимий ва мунтазам кўринишга эга бўлди. Биз бугун бир-биримизни халқаро парламентлараро ташкилотлар доирасида қўллаб-қувватлаймиз доим», — деди у.
Содиқ Сафоев Ўзбекистоннинг Қорақалпоғистон ва Орол денгизига оид барча ташаббуслари Қозоғистон парламенти томонидан қўллаб-қувватланаётганини таъкидлаб ўтди.
«Ўз навбатида, Ўзбекистон ҳам Қозоғистоннинг вакилларини парламентлараро ҳамкорлик ташкилотларида юқори лавозимларга сайлашда қўллаб-қувватлаб келмоқда. Шуни айтиш керакки, икки томонлама комиссия ўз фаолиятини бевосита халқларни безовта қилаётган муаммоларни ечимига ёки улар орзу қилаётган умидларни эришишга қаратмоқда. Масалан, айтайлик икки мамлакатнинг Сенати ўртасидаги навбатдаги учрашув Орол денгизига яқинроқ минтақада бўлади ва унда айнан шу ҳудудларда инновацион ривожлантириш, у ердаги экологик муаммоларни ечимига қаратилган дастурларни биргаликда олиб чиқиш билан боғлиқ бўлади», — деди Сафоев.
«Яна бир бор қайтараман, иттифоқчилик муносабатлари — бу узоқни кўра билиб қабул қилинган стратегик қарордир. Уларнинг, албатта, ҳуқуқий пойдеворини яратиш керак. Шу пойдеворни яратиш, сўнг икки томонлама имзо чекилган ҳужжатларни амалга ошириш жараёнини назорат қилиш — бу парламентларнинг вазифаси. Ўйлайманки, энди навбат парламентларга. Шу икки халқ ўртасидаги муносабатларни кенгайтириш ва янада ривожлантириш, халқларимиз манфаатларига хизмат қилишнинг айни вақти келди ва имкониятлар яратилди», — дея қўшимча қилди Сенат раиси биринчи ўринбосари.
Маълумот учун, Ўзбекистон ва Қозоғистон ўртасида иттифоқчилик муносабатлари тўғрисидаги декларацияда «қардош халқларнинг ҳаётий муҳим ва узоқ муддатли миллий манфаатлари, кўп қиррали шериклик салоҳиятини тўлиқ рўёбга чиқариш» мақсади ўз ифодасини топган.
Изоҳ (0)