«Қўл панжалари билагидан узилиб тушган 36 ёшли аёл ҳаёти сақлаб қолинди». Вазир ўринбосари Деновдаги портлашдан жабрланганлар ҳақида маълумот берди

Сурхондарё вилоятининг Денов шаҳридаги савдо марказида келиб чиққан портлаш оқибатида «Indenim»да ишловчи 36 ёшли аёлнинг панжалари билагидан узилиб тушиб, кўп қон йўқотган ва ҳаёти хавф остида қолган. Шифокорлар ёрдами билан аёлнинг ҳаёти сақлаб қолинган. Бу ҳақда Денов шаҳрида бўлиб ўтган масъуллар иштирокидаги матбуот брифингида соғлиқни сақлаш вазирининг биринчи ўринбосари Амрулло Иноятов маълум қилди, дея хабар берди «Дарё» мухбири.

Вазир ўринбосарининг маълумот беришича, портлаш оқибатида 11 нафар фуқаро — «Indenim» савдо мажмуасида ишловчи 7 нафар, савдо маркази қошидаги сомсахонанинг бир нафар, туман ҳокимлигининг бир нафар ҳамда қўшни бинолардаги икки нафар ишчи жароҳат олган.

«Бинодаги портлаш 03:57 да содир бўлган бўлса, тез ёрдам ходимлари воқеа жойига 4 дақиқада етиб бориб, савдо маркази ичида жабрланганларнинг беш нафарини зудлик билан шифохонага олиб келган (икки нафар фуқаро воқеа жойида вафот этганди). Беш нафар фуқародан икки нафарининг аҳволи оғир бўлиб, улардан бири Феруза Омонованинг қўл панжалари билагидан узилиб тушган. Яъни травматик узилиш содир бўлган. Шунингдек, беморда бош миядан ёпиқ жароҳат олиш, тос суяги синиши, баданида эса турли эзилган ва шилинган жароҳатлар борлиги маълум бўлган. Беморда очиқ ва ёпиқ қон кетиши, яъни ўткир қон кетиши кузатилган. Шунга қарамай мутахассисларимиз беморга ёрдам бериб унинг ҳаётини сақлаб қолди», — дейди вазир ўринбосари.

Амрулло Иноятовнинг қўшимча қилишича, портлаш содир бўлганидан сўнг бош вазир топшириғига кўра, пойтахтдан кўплаб мутахассислар, жумладан, республика шошилинч ихтисослашган тиббиёт маркази раҳбари бошчилигидаги малакали мутахассислар Деновга етиб келиб, беморларга ёрдам кўрсатган.

«Муҳими бемор аёл ҳаётини сақлаб қолдик. Кеча аёл ўта оғир аҳволда эди. Бугун аҳволи жуда яхши. Яқинлари билан суҳбатлашяпти», — деди Амрулло Иноятов.

Соғлиқни сақлаш вазирининг биринчи ўринбосари яна бир беморнинг аҳволи оғир бўлганини, унга ҳам ўз вақтида кўрсатилган ёрдам сабаб ҳаёти сақлаб қолинганини айтган. Бироқ бемор ҳақида бошқа маълумот бермаган. Масъулнинг қўшимча қилишича, қолган беморлар бугун шифохонанинг жонлантириш бўлимидан режали бўлимларга ўтказилган.

Эслатиб ўтамиз, «Дарё» мухбири билан суҳбатлашган Ислом Остонақулов турмуш ўртоғи Феруза Омонованинг портлаш содир бўлгандан кейинги аҳволини гапириб берганди. Хотини ҳақида гапирган бемор портлашдан сўнг аёлининг бақириб, одамларни ёрдамга чақирганини эслаб, «Менга ёрдам берган Собир ака билан бирга бақириб, ёрдамга чақираётган хотинимнинг олдига бордик. Уни бетон босган, калласи йиртилиб ётибди, сочларини бетон бўлаклари қисиб қолган экан, жуда қийин аҳволда эди», – деганди.