Ўзбекистон 2021 йил охирига бориб дунёдаги энг йирик бешта картошка импортёрларидан бирига айланиши мумкин, деб хабар бермоқда EastFruit.
Маълум қилинишича, Ўзбекистон аллақачон картошка импорти бўйича рекордини янгилаган. Мамлакатга 2021 йил 11 ойида 456 минг тонна шу хилдаги сабзавот олиб келинган бўлса, кўрсаткич 2020 йилнинг шу даври учун 421 минг тоннани ташкил этган. Ўзбекистонга картошка импорти уч йил ичида икки баравар кўпайган.
Таъкидланишича, мамлакатда картошканинг улгуржи нархи бир килограмм учун 5 минг сўмга яқин. Нарх ўтган йилга нисбатан 43 фоизга, 2019 йилга нисбатан икки бараварга юқорилаган. «Минтақага картошка етказиб бериш, Покистон ва Эрондаги қиммат логистика билан боғлиқ вазиятни инобатга олсак, янги ҳосил бошланишидан олдин нарх сезиларли даражада ошиши мумкин», дейилади таҳлилда.
EastFruit таҳлилчиларига кўра, 2021 йил охиригача Ўзбекистонга картошканинг умумий импорт ҳажми биринчи марта 500 минг тоннадан ошади. Бу орқали мамлакат энг катта картошка импортёрлари рўйхатида Бельгия, Голландия, Германия ва Италиядан кейинги ўринга кўтарилади.Қайд этилишича, дастлабки уч етакчи картошкани, асосан, қайта ишлаш эҳтиёжлари учун импорт қилади ва музлатилган фри ҳамда бошқа картошка маҳсулотлари сифатида экспорт қилади. Ўзбекистон эса картошкани мамлакат ичида сотиш учун олиб келади. Бу орқали Ўзбекистон соф импорт ҳажми бўйича Италияни четлаб ўтиб, дунёда биринчи ўринни банд этиши мумкин.
Эслатиб ўтамиз, 21 октябрь куни Олий Мажлис Сенатининг йигирманчи ялпи мажлисида Ўзбекистонда гўшт ва картошка импортини ҚҚСдан озод қилиш маъқулланганди. Бюджет ва иқтисодий ислоҳотлар масалалари қўмитаси раиси Эркин Гадоевнинг фикрича, картошка импортига ҚҚСни бекор қилиш ортидан бюджет — 76,5 миллиард сўмни, савдо айланмасидан эса — 30 миллиард сўм йўқотади.
Шунингдек, 2021 йилда Эрондан Ўзбекистонга мева ва сабзавотлар импорти кескин ошиши кузатилди. Йилнинг дастлабки уч чораги давомида 30,3 миллион долларлик мева ва сабзавот маҳсулотлари етказиб берилган.
Бундан ташқари, «Ички истеъмол бозорини асосий турдаги озиқ-овқат маҳсулотлари билан кафолатли таъминлашга доир қўшимча чора-тадбирлар тўғрисида»ги ҳукумат қарори қабул қилиниб, Ўзбекистонга 2021 йилда қандай озиқ-овқат маҳсулотлари импорт қилиниши маълум қилинганди. Унга кўра, республика бўйича жами 2 449 108 тонна картошка импорт асосида келтирилиши назарда тутилган.
Изоҳ (0)