ДХХ Ўзбекистоннинг бир қатор ҳудудларида гиёҳванд моддалар савдоси билан шуғулланган шахсларни қўлга олди (видео)

Давлат хавфсизлик хизмати томонидан ўтказилган тезкор тадбир давомида Ўзбекистоннинг бир қатор ҳудудларидан 24,5 килограммдан ортиқ гиёҳвандлик воситалари мусодара қилинди, деб хабар бермоқда ЎзА.

ДХХнинг Фарғона вилояти бўйича бошқармаси ходимлари томонидан ўтказилган тезкор тадбир давомида Фарғона шаҳрида яшовчи, муқаддам судланган фуқаро (1988 йилда туғилган) ҳайдаб кетаётган Spark тўхтатилиб, кўздан кечирилганда, унинг салонда 4 килограмм 459 грамм опий ва 2 килограмм 975 грамм гашиш гиёҳванд моддалари борлиги аниқланиб, процессуал тартибда расмийлаштириб олинган.

Терговга қадар текширув давомида, у аввалроқ жиноий шеригига (1993 йилда туғилган)  7 килограмм 969 грамм гашиш бергани аниқланиб, ушбу наркотиклар ҳам тегишли тартибда олиб қўйилган.

Яна бир ўтказилган тезкор-қидирув тадбирлари натижасида эса 1973 йилда туғилган икки нафар фуқаронинг Фарғона шаҳридаги яшаш манзилида 1 килограмм 110 грамм гашиш ҳамда 991 грамм опий борлиги аниқланиб, процессуал тартибда расмийлаштириб олинган. Шунингдек, тадбир давомида улардан наркотик сотиб олиш учун Марғилон ва Қўқон шаҳарларидан келган икки харидор ҳам қўлга олинган

ДХХнинг Андижон вилояти бўйича бошқармаси ходимлари томонидан Хўжаобод туманидаги «Дўстлик» халқаро назорат ўтказиш пунктида ўтказилган тезкор тадбирда, Андижон туманида истиқомат қилувчи, муқаддам судланган фуқаро (1988 йилда туғилган) бошқарувидаги Spark’да 6 килограмм 109 грамм гашиш борлиги аниқланиб, ўрнатилган тартибда олиб қўйилган.

ДХХнинг Қашқадарё вилояти бўйича бошқармаси ходимлари томонидан ўтказилган тезкор тадбирда Сурхондарё—Фарғона йўналишида ҳаракатланиб келаётган, Учкўприк туманида яшовчи, фуқаро (1974 йилда туғилган) бошқарувидаги автотранспорт воситаси «Умакай» ЙПХ масканида тўхтатилиб, кўздан кечирилганда автомашинада хўжалик молларини ўлчашга мўлжалланган тарозига хуфиёна жойлаштирилган 1 килограмм 47 грамм гашиш борлиги аниқланган.

Шунингдек, унга ушбу гиёҳвандлик моддасини бериб, ортидан кузатиб келаётган жиноий шериги, Денов туманида истиқомат қилувчи, муқаддам героин савдоси билан боғлиқ жиноят содир этгани учун судланган фуқаро (1973 йилда туғилган) ҳам ҳибсга олинган.

ДХХнинг Қорақалпоғистон Республикаси бўйича бошқармаси ходимларининг Давлат божхона қўмитасининг ҳудудий бошқармаси ходимлари билан ҳамкорликда ўтказган тезкор тадбирида Элликқалъа туманида яшовчи, муқаддам судланган фуқарода (1988 йилда туғилган) 2990 дона Трамадол гиёҳвандлик воситаси борлиги аниқланиб, процессуал тартибда расмийлаштириб олинган.

Ўтказилган тезкор тадбирлар натижасида жами 5 килограмм 450 грамм опий, 19 килограмм 210 грамм гашиш ҳамда 2990 дона Трамадол гиёҳвандлик воситалари мусодара қилинган.

Қайд этилишича, барча ҳолатлардаги гиёҳвандлик воситалари келгусида сотиш мақсадида қўшни давлатлардан контрабанда йўли билан олиб ўтилган. Ҳозирда мазкур ҳолатлар бўйича Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.