25 декабрь куни Тошкентдаги Humo Arena комплексида бўлиб ўтиши эълон қилинган TikTok Fest шоу-концерт дастури ижтимоий тармоқларда кенг муҳокамаларга сабаб бўлди. Маданият вазирлиги танқидларнинг вазирликка қаратилган қисмига муносабат билдирди.
Фото: «Дарё» / Мадина Нурман
Маълум қилинишича Ўзбекистон президентининг 6044-сон фармони 2-иловаси 32-бандига мувофиқ, концерт-томоша тадбирига бир марталик рухсатнома бериш ваколатли бўлган —Ички ишлар вазирлиги, Маҳаллий ижроия ҳокимияти органлари томонидан амалга оширилади. Шу асосда концерт-томошаларнинг савияси, мазмун-моҳияти, ғоясини таҳлил қилиш, томоша бўйича якуний хулосалар бериш ҳам Маҳаллий ижроия ҳокимлиги ҳузурида ташкил этилган тузилманинг вазифаси ҳисобланади.
Шунингдек, юқоридаги каби шоу-концерт томошаларини ташкил этиш Маданият вазирлиги томонидан эмас, хусусий тадбиркорлар томонидан амалга оширилади.
«Шу боис Маданият вазирлиги Tik Tok Fest шоу-концерти юзасидан барча савол ва мулоҳазаларни юқорида келтириб ўтилган ваколатли мутасадди органларга йўллашни тавсия қилади», — дейилади муносабатда.
Вазирликнинг таъкидлашича, Ўзбекистон ҳудудида ўтказиладиган ҳар қандай маданий-маърифий тадбирлар, шоу-томошалар ҳамда концерт дастурлари ўзбек халқи миллий менталитети, ахлоқий тарбияси, тарихан бой маданияти, ёшлар дунёқараши бу каби шоу-дастурларни асло қабул қилмайди. Маданият вазирлиги TikTok Fest шоу-концертини маънавий жиҳатдан ёшлар онгига, дунёқарашига салбий таъсир этади, деб ҳисоблайди.
«Зеро бир неча минг йиллардан буён шаклланиб, қон-қонимизга сингиб кетган инсоний фазилатлар, одоб-ахлоқ меъёрлари таъсирида пайдо бўлган тарбиямиз ҳам буни рад этади. Ўйлаймизки, бу каби оммавий тадбирларни ташкил этаётган мутасаддилар ана шу жиҳатларни ҳисобга олиб, бу масалага жиддий ёндашади», — дея қайд этилади муносабатда.
Ёшлар ишлари агентлиги ахборот хизмати раҳбари Нодир Абдуқодировнинг маълум қилишича, Humo Arena’да режалаштирилган хорижий тиктокерлар иштирокидаги концерт ўтказилмайди.
Унинг ёзишича, Humo муз саройида хорижий тиктокерлар иштирокида концерт бўлиб ўтиши ҳақида хабарлар жамоатчиликнинг кескин норозилигига учраган.
«Мазкур вазият бўйича ўрганишлар олиб бордик ва концерт бекор қилинганини маълум қиламиз. Humo Arena масъулларининг маълумот беришича айнан шу куни саройда бошқа тадбир ўтказилади», — деб ёзади у.
Эслатиб ўтамиз, 2021 йил июль ойи аввалида TikTok, Twitter, Skype, «ВКонтакте»нинг Ўзбекистондаги фаолияти чекланган эди.
