Олий Мажлис Қонунчилик палатасининг 3 декабрь куни ўтказилган мажлисида депутатлар «Алкоголь ва тамаки маҳсулотларининг тарқатилиши ҳамда истеъмол қилинишини чеклаш тўғрисида»ги қонун лойиҳасини иккинчи ўқишда моддама-модда кўриб чиқди. Бу ҳақда парламент қуйи палатаси матбуот хизмати хабар берди.
Қайд этилишича, қонун лойиҳаси алкоголь ва тамаки маҳсулотларининг тарқатилиши ҳамда истеъмол қилинишини чеклаш соҳасидаги муносабатларни тартибга солиш механизмларини такомиллаштириш мақсадида ишлаб чиқилган.
Қонун лойиҳаси билан алкоголь ва тамаки маҳсулотлари, тамаки ҳамда никотин истеъмол қилиш учун мосламаларни реализация қилишга доир чекловлар кенгайтирилмоқда.
Маълум қилинишича, ўтган вақт мобайнида қонун лойиҳаси қўмита томонидан ўтказилган семинар ва давра суҳбатларида илгари сурилган таклифлар, депутатлар берган тавсиялар атрофлича ўрганилиб, маромига етказилган. Қонунчилик техникасидан келиб чиққан ҳолда лойиҳанинг баъзи бир моддалари ўзаро мувофиқлаштирилиб, таркибий жиҳатдан тузатишлар киритилган.
Қонун лойиҳада алкоголь ва тамаки маҳсулотларини истеъмол қилиш мумкин бўлмаган жамоат жойларнинг аниқ рўйхати кўрсатилиб, чекиш учун ажратилган махсус жойларга минимал талаблар белгиланмоқда.
Мажлисда қонун лойиҳаси халқ вакиллари томонидан қизғин муҳокама этилган ва баҳсли бўлган айрим моддаларга таклифлар берилган. Билдирилган таклифларни инобатга олган ҳолда, лойиҳани янада такомиллаштириш мақсадга мувофиқ деб топилган.
Аввалроқ Ўзбекистонда пиводан бошқа барча спиртли ичимликлар нархи кўтарилгани, Ўзбекистонда алкоголь ва тамаки маҳсулотларини акциз маркалари билан маркировкалаш такомиллаштирилиши тўғрисида хабар берилганди.
Изоҳ (0)