Афғонистоннинг собиқ президенти АҚШ «Толибон» ҳукумати билан ҳамкорлик қилиши кераклиги ҳақида гапирди

Афғонистоннинг собиқ президенти Ҳамид Карзай «BBC Жаҳон хизмати»га берган интервьюсида АҚШ президенти Жо Байденга шундай мурожаат йўллади. Унинг сўзларига кўра, халқаро ҳамжамият афғонларга ўз мамлакатини тиклашда ва урушда етказилган жароҳатларни даволашда ёрдам бериши зарур.

Карзай АҚШнинг Афғонистон бўйлаб авиазарбалар йўллашига қарши эканини билдирди:

«Агар улар (АҚШ ) Афғонистон устидан ўз самолётларини учирса ёки бизнинг ҳудудимизга қўшин киритса, бу нотўғри бўлади. Биз АҚШ билан дўстликни истаймиз. Иттифоқчилармиз, лекин дўстлик билан бизнинг осмонимиз узра қирувчи самолётларнинг учишида фарқ бор».

«Мен мамлакатдан чиқиб кетган барча афғонлардан ортга қайтиб, юртимизни тиклашни сўрайман. Бу сизнинг ватанингиз, биз бирлашишимиз керак. Биз шу заминнинг фарзандларимиз, мамлакатни тарк этмаслигимиз, Афғонистонда қолиб уни барпо этишимиз зарур», — деди мамлакатнинг собиқ президенти.

Карзай «Толибон» ҳаракати билан мамлакатдаги мавжуд вазият юзасидан самарали фикр алмашганини таъкидлади:

«Толибон» билан учрашувлар ўтказдик. Турли масалалар, жумладан, аёлларнинг ишга, мактабга қайтиши, мамлакат байроғи, сиёсий жараён ва барча афғонлар манфаатларини акс эттирувчи ҳукумат зарурлиги ҳақида яхши фикр алмашдик».

«Толибон» томонидан фаолияти тугатилган қизлар мактабларининг қайта очилиши ҳақида гап кетар экан Карзай толиблар «буни тушунади ва муаммо ҳал қилинади» деб ҳисоблайди:

«Қизларнинг нафақат мактабга қайтишини, балки олий ўқув юртлари, иш жойларига қайтишини истаймиз. Бу ҳақда «Толибон» билан гаплашдик. Улар рози бўлишди, тушунишди ва бу иш бўлади деб айтишди. Биз эса бу ҳозироқ амалга ошиши керак деяпмиз».

Собиқ олий бош қўмондон сифатида Карзай афғонлар нега жанг қилмагани ва ўз ватани ҳимоясига отланмагани ҳақидаги саволга шундай жавоб берди:

«Афғонлар жасур халқ. Аскарларимиз ҳам, ‘Толибон’ ҳам. Икки томон ҳам афғон. Қачонлардан бери айтаман: биз оға-инимиз, мамлакатимизни барпо этиш учун бирга меҳнат қилишимиз, бирлашишишимиз зарур».

Ҳамид Карзай ва Миллий ярашув кенгашининг собиқ раиси Абдулла Абдулла «Толибон» Афғонистонда назорат ўрнатганидан кейин ҳам мамлакатда қолган Афғонистоннинг икки энг муҳим етакчиларидир. Улар Кобулда ҳамон сиёсий фаоллик кўрсатмоқда.

Сентябрь ўртасида Ҳамид Карзай «Толибон» ҳаракатининг сиёсатини танқид қилиб чиқганди. Ўшанда Карзай толибларни мамлакатда ҳокимиятни эгаллаб олганидан кейин берган ваъдаларини бажармаётганликда айблаган.