Бугун,

  • USD 10920.28
  • RUB 177.49
  • EUR 11052.42

Ижтимоий тармоқларда Андижон давлат университетининг Тарих факультети биносининг тўртинчи қаватидан ҳомиладор аёл тушиб кетгани ҳақида хабарлар тарқалди.

Фото: Андижон давлат университети матбуот хизмати

Университет ахборот хизматининг «Дарё»га маълум қилишича, 2021 йилнинг 4 декабрь куни Андижон давлат университети Ижтимоий-иқтисодиёт факультетининг Амалий психология йўналиши 2-босқич талабаларининг ота-оналари учун мажлис ўтказилган. Мажлис университетнинг Тарих факультети биносининг 4-қаватида жойлашган кичик мажлислар залида бўлиб ўтган. Унда иштирок этган талабалардан бирининг келинойиси йиғилишдан чиқиб, телефонда яқинлари билан суҳбатлашиш давомида қурилиш бўлаётган ҳудудни англатувчи тўсиқларга аҳамият бермасдан зинапояга юриши натижасида тушиб кетган.

Ҳодиса юз берган вақтнинг ўзидаёқ университетнинг масъул ходимлари томонидан шошилинч тез ёрдам чақирилиб, фуқаро республика шошилинч тез тиббий ёрдам илмий маркази вилоят филиалига университет маъмурияти вакиллари ҳамроҳлигида олиб борилган ва биринчи ёрдам кўрсатилган.

Айни пайтда бахтсиз ҳодиса юзасидан прокуратура ва ички ишлар ходимлари томонидан суриштирув ишлари олиб борилмоқда.

Қайд этилишича, айни пайтда ушбу бинода капитал таъмирлаш ишлари олиб борилаётган бўлиб, воқеа содир бўлган зина томондан чиқиш ёпилган. Тўртинчи қаватда хавфсизликни таъминлаш, талабаларни қурилиш бўлаётганидан огоҳлантириш учун тўсиқ сифатида столлар оралатган ҳолатда жойлаштирилган. Шундай бўлса-да, фуқаро бошқа хаёллар билан тўсиққа эътибор қилмаслиги натижасида бахтсиз ҳодиса содир бўлган.

Изоҳ: Ушбу хабар 4 декабрь куни соат 17:30 да таҳрирланди. Хабарнинг дастлабки таҳрири сарлавҳасида 4-қаватдан тушиб кетган аёл ҳомиладор бўлгани ёзилганди. Кейинроқ университет ахборот хизмати аёлнинг ҳомиладор бўлмаганини маълум қилди. «Дарё» таҳририяти мазкур хато ва текширилмаган ахборот орқали етказилган ноқулайликлар учун узр сўрайди.

Бундан аввал Андижонда фуқаро уйида ўзини осиб ўлдиргани ҳамда Қашқадарёда техникум талабаси ётоқхонанинг 5-қаватидан тушиб кетиб, вафот этгани ҳақида хабар берилганди.

Изоҳ
Асосий янгиликлар