Ўзбекистонда 15 кун ичида 25 мингга яқин ўзбекистонлик олти турдаги вакцина билан эмланди. Хусусан, мамлакатга яқинда олиб келинган «Спутник Лайт» вакцинасининг 7,5 минг дозаси аллақачон тугаган.
Бу ҳақда Ўзбекистон ўлат профилактикаси маркази директорининг эпидемиологик масалалар бўйича ўринбосари, тиббиёт фанлари номзоди Дилмурод Мирзабоевга таяниб, «Sputnik Узбекистан» хабар қилди.
Дилмурод Мирзабоевнинг сўзларига кўра, айни дамда янги партияни олиб келиш, шунингдек, республикада Россиянинг ушбу вакцинасини ишлаб чиқариш имкониятлари муҳокама қилинмоқда.
Бундан аввал Россия Соғлиқни сақлаш вазирлиги томонидан меҳнат мигрантларини эмлаш учун янги турдаги «Спутник Лайт» (Sputnik Light) вакцинасининг 12 минг дозаси Ўзбекистонга олиб келингани хабар қилинганди. Ушбу вакцина билан фақат Ўзбекистондан юборилиши мўлжалланган 10 минг нафар қурувчи мигрантлар эмланиши ва вакцинация жараёни россиялик тиббиёт ходимлари томонидан амалга оширилиши айтилганди.
Маълумот учун, «Спутник Лайт» бир компонентли вакцина бўлиб, у билан тўлиқ эмланиш учун вакцинанинг бир дозасини олиш кифоя қилади.
