«Ўзбекистон Республикаси жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида»ги президент фармони имзолангани ҳақида хабар берилган эди. Фармон билан 2022—2025 йилларда Ўзбекистонда жамоат хавфсизлигини таъминлаш тизимини ривожлантириш стратегияси тасдиқланган.

Унга кўра, фармон билан илғор хорижий тажрибага таянган ҳолда йўл ҳаракатини ташкил этишда ваколатли давлат органлари ва жамоат тузилмаларининг фаолиятини ва ўзаро ҳамкорлигини «Равон йўл» тамойили асосида ташкил этиш, мувофиқлаштириш ҳамда уларнинг ваколатлари доирасини аниқ белгилашни назарда тутган ҳолда, ушбу соҳадаги муносабатларни тўғридан-тўғри қонун нормалари билан тартибга солиш, «Йўл – пиёда учун» тамойилини кенг жорий этиш белгиланган.

Шунингдек, ҳужжатга мувофиқ транспорт воситалари ҳайдовчилари томонидан содир этиладиган йўлдаги безорилик ҳолатлари билан ифодаланадиган хатти-ҳаракатлар учун маъмурий жавобгарликни жорий этиш белгилаб қўйилди. Бундан ташқари, қуйидагилар ҳам фармонда ўз аксини топган:

  • давлат-хусусий шериклик ва аутсорсинг механизмларини йўл ҳаракати хавфсизлигини таъминлаш тизимига ва йўл инфратузилмасини такомиллаштириш жараёнига жорий этиш;
  • «Йўл ҳаракати интизоми болаликдан бошланади» шиори остида умумтаълим муассасаларида йўл ҳаракати қоидалари бўйича ўқув тадбирларини ташкил этиш;
  • умумтаълим муассасаларида «Ҳаракат хавфсизлиги синфхоналари»ни, маҳаллаларда йўл ҳаракатини ўргатиш майдончаларини ташкил этиш.

Аввалроқ Ўзбекистондаги маҳаллалар криминоген вазият бўйича «яшил», «сариқ» ва «қизил» тоифаларга ажратилиши тўғрисида хабар берилганди.