O‘zbekiston prezidentining “O‘zbekiston Respublikasi jamoat xavfsizligi konsepsiyasini tasdiqlash va uni amalga oshirish chora-tadbirlari to‘g‘risida”gi farmoniga muvofiq, hududlarda tinchlik va osoyishtalikni ta’minlash faoliyatining samaradorligini oshirish choralari belgilanmoqda.
Xususan:
- kriminogen vaziyat haqidagi ma’lumotlarni mahallalar kesimida tahlil qilish elektron tizimi yaratilib, hududlarni avtomatik ravishda “yashil”, “sariq” va “qizil” toifalarga ajratish tartibi joriy etilmoqda (hozirda jinoyatlarni mahalla kesimida avtomatik hisoblash tizimi mavjud emas va bu boradagi ishlar eskicha uslubda qo‘lda bajariladi);
- hududdagi sektorlar rahbarlarining jinoyatlarga qarshi kurashish borasidagi faoliyatini tashkil etish mexanizmlari belgilab berilmoqda. Unga ko‘ra, sektor rahbarlari “yashil” toifadagi mahallalarda amalga oshirilgan ishlarni bevosita o‘rganib chiqishi hamda ijobiy ish uslublari, amalga oshirgan tadbirlarni sektorning “sariq” va “qizil” toifadagi mahallalarida ommalashtirish choralarini ko‘rishi belgilanmoqda.
Bunda, “temir daftar”, “ayollar daftari” va “yoshlar daftari”ga kiritilgan shaxslar bilan olib borilayotgan ishlar, aholining bandligini ta’minlash, fuqarolarning huquqiy ongi va huquqiy madaniyatini oshirish tadbirlarining samarali tashkil etilganiga e’tibor qaratiladi.
Shuningdek, jinoyatchilikka qarshi kurashish bo‘yicha 14 ta “Hudud metodikasi” yaratiladi. 2022–2025-yillarda O‘zbekistonda jamoat xavfsizligini ta’minlash tizimini rivojlantirish strategiyasida quyidagilar belgilangan:
- jamoat xavfsizligini ta’minlash, guruhiy qonunbuzarliklar va ommaviy tartibsizliklarni bartaraf etish bo‘yicha 14 ta (Qoraqalpog‘iston Respublikasi, Toshkent shahar va viloyatlar) “Hudud metodikasi”ni ishlab chiqish va amaliyotga tatbiq etish;
- sodir etilgan jinoyat va huquqbuzarliklarning asl omillarini “ilmiy diagnoz” asosida aniqlash va “ilmiy diagnoz xulosasi” bilan “E-jamoat xavfsizligi” axborot tizimi orqali rasmiylashtirish tartibini joriy qilish.
Avvalroq O‘zbekistonda ochilmagan jinoyatlarni tadqiq etish bilan shug‘ullanuvchi institut tashkil etilgani, O‘zbekistonda jinoiy javobgarlikka tortishning eng kam yoshini 13 yoshdan 14 yoshga oshirish rejalashtirilayotgani to‘g‘risida xabar berilgandi.
