«Замин» фонди Васийлик кенгаши раиси Зироат Мирзиёева Қашқадарё вилоятига ташрифи доирасида 17-сонли ногиронлиги бор болалар учун ихтисослаштирилган мактаб-интернатида бўлди.
Фонд матбуот хизмати томонидан эълон қилган суратларда унга қизи — Мактабгача таълим соҳаси сиёсатини шакллантириш ва стратегик ривожлантириш бош бошқармаси бошлиғи Шаҳноза Мирзиёева ҳамроҳлик қилганини кўриш мумкин.
Қайд этилишича, бу ерда фонд кўмагида Замин Education информатика синфи замонавий технологиялар билан жиҳозланган. Шунингдек, «Замонавий ёрдамчи асбоб-ускуналар билан жиҳозлаш» лойиҳаси доирасида 24 та фронтал ва 12 та якка тартибдаги ўқув хонасига замонавий ФМ тизимлари ўрнатилди.
«Мен эшитяпман!» лойиҳаси доирасида Қаршидаги мактабнинг барча ўқувчилари диагностикадан ўтказилди ва 413 нафар ўқувчига иккитадан замонавий рақамли эшитиш аппарати топширилди.
«Бизнинг барча ҳаракатларимиз сизнинг эртанги кунингиз учун бўляпти. Мақсадимиз аниқ — чуқур билим олинг, билимларингизни ҳаётда қўлланг ва жамиятда ўз ўрнингизни топинг. Умид қиламанки, сиз илм йўлида ҳеч қандай тўсиқларга учрамайсиз. Келажакда катта зафарларга эришасиз», — деган Зироат Мирзиёева болаларга қарата мурожаатида.
Бундан аввал Зироат Мирзиёева Жиззах вилоятидаги мактаб-интернатларда бўлганди. Ташриф давомида «Замин» фонди эшитиш қобилияти заиф болалар таълимини қўллаб-қувватлаш дастури доирасида мактабларга замонавий ФМ тизимларини совға қилган.
Изоҳ (0)