Туркия Европа кенгашини туркиялик тадбиркор ва жамоат арбоби Усмон Каваланинг иши бўйича режалаштирилган қарор юзасидан Анқарага босим ўтказмасликка чақирди. Бу ҳақда Европа ОАВларига таяниб, «Интерфакс» хабар берди.

Фото: iStock

«Биз Европа Кенгашини давом этаётган суд жараёнини ҳурмат қилган ҳолда, суд ҳокимияти мустақиллигига халақит берадиган қарорлар қабул қилишдан тийилишга чақирамиз», — дея Туркия Ташқи ишлар вазирлиги баёнотидан парча келтирди ОАВ.

Октябрь ойида Германия, Дания, Канада, Нидерландия, Янги Зеландия, Норвегия, АҚШ, Финляндия, Франция ва Швеция элчилари қўшма баёнот чиқариб, Туркия ҳукуматини узоқ вақтдан бери ҳукмсиз қамоқда сақланаётган «Кавала масаласини тезроқ ва имкон қадар адолатли ҳал қилишга» чақирган эди. Уларнинг қайд этишича, Каваланинг ҳибсда ушлаб турилиши Туркияга «соя солмоқда». Ушбу баёнот дипломатик низога сабаб бўлди.

Мурожаат чоп этилгач, элчилар Туркия Ташқи ишлар вазирлигига чақирилган ва у ерда мамлакат ички ишларига аралашишга уринишда айбланган. Туркия президенти Ражаб Тоййиб Эрдўғон элчиларни Туркиядан чиқариб юбориши мумкинлиги ҳақида огоҳлантирган.

Кейинроқ Эрдўғон элчиларни persona non grata деб эълон қилишни буюрганидан сўнг, элчилар янги баёнот билан чиқиб, Вена конвенциясининг мамлакат ички ишларига аралашмаслик мажбуриятини юклаган моддасига амал қилишларини билдирди. Шу тариқда улар Туркиядан чиқариб юборилмайдиган бўлди.

Асли Парижда туғилган филантроп ва жамият фаоли, 64 ёшли Усмон Кавала 2017 йил ноябрь ойида ҳибсга олинган. У Истанбулдаги Гези боғи атрофидаги оммавий намойишларда иштирок этганликда ва 2016 йилда давлат тўнтаришига уринганликда айбланган. Кавалага қўйилган айбловлар бир неча бор кўриб чиқилган, бироқ у ҳануз ҳибсда қолмоқда.

Европа суди 2019 йилда Туркия ҳуқуқ-тартибот идораларида Кавалани ҳибсда ушлаб туриш учун салмоқли далиллар йўқлиги ҳақида қарор чиқарган. Туркия ҳукумати суднинг қарорини бажармади.