Қашқадарёда боғча раҳбарияти текширувчилардан яшириб болаларни ҳожатхонага қамаб қўйгани, ҳолат юзасидан тегишли органлар томонидан суриштирув ишлари олиб борилаётгани ҳақида хабар берилган эди. Вилоят Мактабгача таълим бошқармаси матбуот хизмати ушбу боғча мудираси ва бошқаларга жиноят иши очилганини маълум қилди.
Қайд этилишича, Қарши шаҳридаги 32-давлат мактабгача таълим ташкилотида болаларни ҳожатхонага яшириб турилгани ҳолати ва бошқа камчиликларни ўрганиш юзасидан Бош прокуратура ҳузуридаги иқтисодий жиноятларга қарши курашиш департаменти Қарши шаҳар бўлими томонидан 29 ноябрда хат келган.
Хатда келтирилишича, Қарши шаҳар мактабгача таълим бўлими тасарруфидаги 32-сонли давлат мактабгача таълим ташкилотининг 2021 йилнинг 1 январидан 1 ноябригача бўлган даврда молия-хўжалик фаолияти юзасидан ўтказилган текширишда 80 153 669 сўмлик бюджет маблағларини ўзлаштириш ва растрата қилиш йўли билан талон-торож қилиш ҳамда суд ҳужжатларини ижро этмаслик жинояти аломатлари аниқланган.
Шу сабабли ушбу мактабгача таълим ташкилоти мудираси З.Қ. ва бошқаларга нисбатан Жиноят кодексининг тегишли моддалари билан жиноят иши қўзғатилиб, жиноят иши дастлабки тергов ҳаракатларини олиб бориш учун Қарши шаҳар прокуратурасига юборилган.
Аввалроқ Қашқадарёнинг Нишон туманидаги 1-сонли давлат мактабгача таълим ташкилотида боғча мудираси ва ёрдамчи тарбиячи ўртасида бўлиб ўтган жанжал туман ИИБ назоратига олингани ҳақида хабар берилган эди.
Изоҳ (0)