Бухорода 2021 йилнинг мос даврига қадар коррупцияга оид 65 та жиноят аниқланиб, 76 нафар мансабдор шахс жиноий жавобгарликка тортилгани аниқ бўлди. Бу ҳақда «Дарё»га Бош прокуратура ҳузуридаги департаментнинг Бухоро вилояти бошқармаси ахборот хизмати маълум қилди.
«Вилоятда ҳуқуқни муҳофаза қилувчи органлар билан коррупция ҳолатларига қарши олиб борилган ҳамкорликдаги тадбирлар давомида 65 та жиноят фош этилди. Шундан 76 нафар мансабдор шахс жиноий жавобгарликка тортилди. Ачинарлиси, 2020 йилнинг мос даврида бу кўрсаткич 32 тани ташкил этганди.
Фош этилган коррупциявий жиноятларнинг 5 таси олий таълим, 5 таси халқ таълими, 2 таси мактабгача таълим, 9 таси соғлиқни сақлаш тизимида, 6 таси кадастр соҳасида, 5 таси ички ишлар ва 4 таси ҳокимият тизимларида, 2 таси банк соҳасида ва 27 таси экология, ДСЭНМ, бандлик, қурилиш ва ҳоказо соҳаларда содир этилган», — дейилади «Дарё»га берилган манбада.
Таъкидланишича, ноябрь ойининг сўнгги ўн кунлигида фуқарони ўқишга киритиб қўйиш билан боғлиқ кетма-кет учта коррупциявий жиноят фош этилган.
«Биринчи ҳолатда бухоролик фуқаро М.А. бошқа бир фуқаро С.Ж.ни танишлари ёрдамида Тошкент молия институтига иккинчи мутахассислик бўйича ўқишга киритиб қўйиш эвазига 1700 долларни фирибгарлик йўли билан олаётган вақтда қўлга олинган бўлса, кейинги ҳолатда вилоят касбий таълимни ривожлантириш ва мувофиқлаштириш ҳудудий бошқармаси бўлим бошлиғи М.Х. икки нафар фуқарони Ғиждувон ва Бухоро тиббиёт коллежларига ўқишга киритиш эвазига 1000 доллар олаётган вақтда ашёвий далиллар билан ушланди.
Таълим тизимидаги учинчи тезкор тадбир давомида Ғиждувондаги ҳамшираларни тайёрлаш бўйича ўқув курси раҳбари С.Р. эса ўқишга кириш истаги бўлган фуқаро Г.Р.ни Урганч шаҳридаги тиббиёт техникумига ўқишга киритиб қўйишга ваъда бериб, ундан 1300 долларни олган вақтида қўлга олинди.
Барча ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда», — дейди бошқарма ахборот хизмати раҳбари.
Изоҳ (0)